प्रहरीद्वारा आइतबार दोलखामा थप ४ किलो सुन बरामद

१४ असोज, काठमाडौं । आइतबार दोलखामा थप ४ किलो सुन बरामद भएको छ ।  दोलखा प्रहरीले चिनीयाँ नाकाबाट तस्करी गरेर ल्याएका थप ४ किलो सुन विगु गाउँपालिका–१ लामाबगरबाट बारीमा ढुंगाले थिचेर लुकाएको अवस्थामा बरामद गरेको हो प्रहरीले चीनबाट अवैधरुपमा ल्याएर लुकाएको सुन बुधबार ४ किलो र शुक्रबार ३ किलो सुन प्रहरीले पक्राउ गरेको थियो । 

दोलखाका प्रहरी प्रमुख दिपक खड्काका अनुसार लामाबगरमा बारीमा ढुंगाले थिचेर लुकाएको अवस्थामा फेला परेको र सो सुन तस्करी गरी लुकाउने व्यक्ति पहिचान भएका व्यक्ति फरार रहेका छन् । यो सहित प्रहरीले गएको ५ दिनमा ११ किलो सुन बरामद गरेको छ । 

यसअघि सुन तस्करीमा संलग्न थप २ जना पनि पक्राउ परेका छन् । पक्राउ पर्नेमा विगु गाउँपालिका–१ लामाबगर ३० वर्षीय चसमान तामाङ र अन्दाजी २७ वर्षीय राज तामाङ रहेको प्रहरीले जनाएको छ । सुन तस्करीमा संलग्न रहेको ओरोपमा चसमानलाई लामाबगरबाट आइतबार र राजलाई काठमाडौंबाट शुक्रबार पक्राउ गरी दोलखा ल्याइएको प्रहरीले जनाएको छ । 

सुन तस्करीको आरोपमा हालसम्म एकै गाउँका ७ जना पक्राउ परेका छन् । प्रहरीले हालसम्म तस्करले ल्याएको ११ किलो सुन पक्राउ गरेको छ । फलाकबाट चीनको रोङजिया नाकाबाट ठूलो परिमाणमा सुन पैदलमार्गबाट भित्रिएको अनुमानमा प्रहरीले उक्त क्षेत्रमा निगरानी बढाएको छ ।