हाम्रो प्रतिस्पर्धा राम्रो छ, एक दिन अवश्य जीत हुनेछः ओली

१६ असोज, काठमाडौं । नेकपा एमालेका अध्यक्ष केपी शर्मा ओलीले नेपाली क्रिकेटरले खेलेको खेल सन्तोषजनक रहेको बताएका छन् । उनले नेपालको हार प्रतिस्पर्धात्मक भएकोमा सन्तुष्ट व्यक्त गरेका छन् ।

एशियाली खेलकूद प्रतियोगिता टी–२० क्रिकेट अन्तर्गत क्वार्टर फाइनल खेलमा नेपाल भारतसँग २३ रनले पराजित भएपछि ओलीले एकदिन जीत हुनेमा आशावादी हुनु पर्ने बताएका छन । मात्र २३ रनको फरक, हाम्रो प्रतिस्पर्धी क्षमता बढेको छ, ओलीले सामाजिक सञ्जालमा लेखेका छन, कोसिस गर्नेको एक दिन अवश्य जित हुन्छ । 

चीनको हाङजाउमा मंगलबार बिहान भएको नेपाल भारतसँग २३ रनले पराजित भएको थियो । भारतले दिएको २०३ रनको लक्ष्य पछ्याउने क्रममा नेपाल नौ विकेटको क्षतिमा १७९ रनमा सीमित हुँदै बाहिरिए पछि ओलीको सो प्रतिक्रिया आएको हो ।

भारतसँगको खेलमा नेपालका लागि दीपेन्द्रसिंह ऐरीले ३२, कुशल मल्ल र सन्दीप जोराले २९–२९, कुशल भुर्तेलले २८, करण केसीले १८ र आशिफ शेखले १० रन बनाएका थिए भने अन्य खेलाडीले दोहोरो अंक पनि जोड्न नसके पछि अन्ततः नेपाल २३ रनले पराजित हुन पुग्यो ।

नेपालका लागि दीपेन्द्रसिंह ऐरीले दुई, सोमपाल कामी र सन्दीप लामिछानेले एक–एक विकेट लिन सफल भएका थिए । यो हारसँग नेपाल प्रतियोगिताबाट नै बाहिरिएको छ भने भारत सेमिफाइनलमा प्रवेश गरेको छ ।