भन्सार नाका रानीबाटै व्यापक तस्करी मौलायो, नेपाल प्रहरी र सशस्त्र प्रहरीको मिलेमतो

१६ असोज, विराटनगर । लक्ष्य अनुसारको राजश्व नउठेर कर्मचारीलाई तलब खुवाउनै हम्मे हम्मे परेको सरकार कै रखवाला प्रहरीसँगको मिलेमतोमा तस्करहरूले भने दैनिक लाखौँको राजश्व छलि गर्ने गरेका छन् । सरुवा भएर सीमा प्रहरी कार्यालय आएको एक महिना पनि नपुग्दै नेपाल प्रहरीका इन्चार्जले तस्करी लाइन खोलेको आरोप छ ।

समाचार स्रोतले दिएको जानकारी अनुसार इलाका प्रहरी कार्यालय रानी विराटनगरका प्रहरी निरीक्षक सन्दीप बेल्बासे र सशस्त्र राजश्व गस्ती र बीओपीको मिलेमतोमा केही तस्करहरूलाई धमाधम लाइन बाँडेर तस्करी खोलिएको हो ।

दशैं लगायतका चाडपर्व आएको भन्दै तस्करहरूको समूहले नेपाल प्रहरी र सशस्त्र प्रहरीलाई प्रभावमा पारेर तस्करी लाइन खुला गरिएको दावी समाचार स्रोतको छ ।  माओवादीको कोटामा हालै रानी नाका सरुवा भएर गएका इन्स्पेक्टर बेल्बासेले आफू हाजिर भएको एक महिना पनि नपुग्दै तस्करलाई लाइन बाँडेर असुल्न थालेका हुन् ।

विगतमा सशस्त्र प्रहरीले सीमाबाट हुने तस्करी टाइट गरेकोमा हाल लुज गरिएको बताइएको छ । इन्स्पेक्टर बेल्बासेले सिभिलमा घुमुवा प्रहरी नराखेपनि क्यूआरटी (QRT) टोलीलाई परिचालन गरेर मुख्य नाका पुरानो रानी भन्सार, मटेरुवा, दरैया, फिरोजा र बुद्ध नगरबाट तस्करी हुने गरेको स्रोतको दावी छ ।

तस्करहरू सुरेश र सवनमले बुद्धनगर नाकाबाट लत्ताकपडा लगायतको तस्करी धन्दा संचालन गर्ने गरेका छन् भने सिता चौधरीले तरकारी, आलुप्याज लगायतको लाइन पाएको बताइएको छ । अर्का तस्कर अकबर तथा ओमले पनि सर्टिङ सुटिङ कपडाको कारोवार दरैया रानी र मटेरुवा नाकाबाट गर्ने गरेका छन् । त्यस्तै कमलेश चौधरी तथा मोनिका ग्रुपले दरैया पोष्टबाट कपडा, काजु किसमिस लगायतको कारोबार भन्सार छलि गरी गर्ने गरेको बताइएको छ । 

तस्करहरूले पिकअप गाडी, रिक्सा तथा साइकलबाट दैनिक लाखौंको राजश्व छलेर करोडौंका सामान वारपार गर्ने गरेको समाचार स्रोतको भनाई छ । त्यस्तै खाद्यान्नको पनि अवैध कारोबार यो नाकाबाट निर्वाध ढंगले चलेको छ ।

प्रहरीले होटलहरूबाट पनि महिनावारी रकम असुलने गरेको आरोप लागेको छ । यो नाकाबाट ठूलो मात्रामा सुपारी, छोकडा, मरिच, नेपाली रक्सी तथा चाइनीज स्याउ पनि भारततर्फ चोरी पैठारी हुने गरेको छ ।