निर्माण व्यवसायीको भुक्तानी छिटो दिन संसदीय समितिको निर्देशन, भौतिक मन्त्रालयले मात्र ४ अर्ब दिन बाँकी

१७ असोज, काठमाडौं । प्रतिनिधिसभाको पूर्वाधार विकास समितिले निर्माण व्यवसायीहरूले काम गरेवापत पाउनुपर्ने बक्यौता रकमको भुक्तानी गर्ने व्यवस्था मिलाउन सरकारलाई निर्देशन दिएको छ । भौतिक पूर्वाधार तथा यातायात मन्त्रालयमार्फत यस्तो रकम दिन निर्देशन दिइएको छ । 

बुधबार सिंहदरबारमा आयोजित समितिको बैठकमा सांसदहरुले निर्माण व्यवसायीको भुक्तानी रोकिएको सम्बन्धमा ढिलाई हुनुको कारणसहित प्रश्न उठाएपछि समितिले छिटो भुक्तानी दिन निर्देशन दिएको हो ।

त्यस्तै ठेक्का सम्झौता अनुसार तोकिएको समय र गुणस्तर अनुसार काम गर्ने वातावरण मिलाउन पनि समितिले निर्देशन दिएको छ । समितिमा बोल्दै भौतिक पूर्वाधार तथा यातायात मन्त्री प्रकाश ज्वालाले निर्माण व्यवसायीले काम गरेको रकम विशेष व्यवस्थापन गरेर भएपनि भुक्तानी गर्ने टुंगोमा पुगेको बताए ।

उनका अनुसार अन्य मन्त्रालयको ३ र भौतिक मन्त्रालयको मात्र ४ अर्ब रुपैयाँ भुक्तानी दिन बाँकी छ । काम गरेको रकमको भुक्तानी नपाएपछि नेपाल निर्माण व्यवसायी महासंघको अगुवाईमा व्यवसायीहरु आन्दोलित बनेका थिए ।