सेनाको भावी कमाण्ड को हो ? दुई जर्नेल बिदा बस्दै

२१ असोज, काठमाडौं । प्रधानसेनापति प्रभु राम शर्मा बेलायतको औपचारिक भ्रमणमा जाँदै गर्दा भावी प्रधानसेनापति को हुने भन्ने अन्योल उत्पन्न भएको छ । प्रधानसेनापति भएपछि भारत र अमेरिकाको औपचारिक भ्रमण गरिसकेका उनी बेलायतको ६ दिने भ्रमण सकेर नेपाल फर्केपछि उत्तरी छिमेकी चीनको औपचारिक भ्रमणको तयारीमा रहँदा सेनामा उनीपछि को प्रधानसेनापति हुने भन्ने अन्योल उत्पन्न भएको हो ।

‘उहाँ जानु अघि नै भावी सेनापति तय गर्नुपर्ने थियो तर यस्तो गर्नु भएन, उहाँ जाँदा सेनामा देखिएको भावी प्रधानसेनापति अन्योल कायम छ’, नेपाली सेनाका एक अधिकारीले भने । उनका अनुसार प्रधानसेनापति  शर्मा ०८१ भदौमा अवकाश हुँदैछन् ।  उनीपछि रहेका सरोज प्रताप राणा पनि १ वर्षे म्याद थप्नै नपाई अर्को हप्तादेखि बिदामा बस्दैछन् । राणापछिका सीताराम खड्का समेत छिट्टै घर जान लागेकाले तारा ध्वज पाण्डे र अशोक सिग्देलबीच प्रतिस्पर्धा हुँदैछ । राणा विदामा बसेको या अवकाश भएको १३ दिनभित्र यसबारे निर्णय भएन भने मेजर जर्नेलमै तारा ध्वज पनि घर जाने अवस्था भएकाले भावी प्रधानसेनापतिबारे अन्योल सिर्जना भएको हो ।

प्रधानसेनापति शर्मा बेलायतका प्रधानसेनापति जनरल सर प्याट्रिक सान्ड्रेसको निमन्त्रणामा बेलायत भ्रमणमा निस्कन लागेका हुन् । नेपाल र बेलायतको सेना बीचको सम्बन्ध निकै पुरानो र बलियो रहेको छ । नेपालीहरू बेलायती सेनामा रहेका र उनीहरूले भीभीआईपीहरुकै सुरक्षामा समेत भूमिका निभाउने हुनाले पनि नेपाली प्रति बेलायती बुझाई सकारात्मक र सेनामा पनि त्यो प्रभाव देखिने गरेको छ ।

आठ वर्ष अघि भुकम्पको समयमा बेलायती सेनाले आफ्नो चिनुक हेलिकोप्टर नेपाल ल्याएर उद्धार कार्यमा लाग्न खोज्दा नेपालले सहमति नदिएपछि सम्बन्धमा केही चिसोपन आएको थियो । अहिले सम्बन्ध राम्रो रहिसकेकाले पनि यो भ्रमणले सुधार हुने नेपाली सेनाले विश्वास लिएको छ । उनी २६ असोजमा फर्किने छन् । सेना प्रमुखको रुपमा दुई वर्ष पुरा गरिसकेका शर्माले अब हुने नेपाली सेनाको प्रमुखको लाइन पनि स्पष्ट पार्न पर्नेछ बताइए पनि चीन भ्रमणको तयारी भएकाले ढिलाई हुने देखिएको छ ।

अघिल्ला सेनापति पूर्णचन्द्र थापाले दुई वर्षे कार्यकाल पुरा गरेकै दिनमा दिएको भाषणमा नै को प्रमुख हुने अन्यौलता आफूले चिरेका थिए । त्यतिबेला नै शर्मा आगामी सेनापति भन्ने स्पष्ट भइसकेको थियो । यद्यपि जाने बेलामा समय थप्‍ने लगायतका विषयमा भएको छलफल र तयारी विना कमाण्ड प्रणालीमा लैजाने निर्णयले थापा विवादित बने । शर्माले पनि अब्बल व्यक्तिलाई भावी प्रधानसेनापतिको स्पष्ट संकेत दिएर अघि बढाएकै भएपनि बाहिर सार्वजनिक गरिएको छैन । ‘उहाँको मनमा भएर हुँदैन सेनाभित्र र बाहिर यो विषयमा चासो हुन्छ, त्यसकारण समयमै प्रष्ट पार्नुपर्छ’, स्रोतले भन्यो ।