एमाले सुदूरपश्चिम अधिवेशनमा सो क्षत्रकै नेता भीम रावललाई दिइएन निम्तो, अध्यक्षमा तीनजनाको दाबी

२१ असोज, धनगढी । नेकपा एमालेको सुदूरपश्चिम प्रदेश कमिटीको प्रथम अधिवेशन आइतबारबाट सुरु भएको छ । अधिवेशन उद्घाटनका लागि एमाले अध्यक्ष केपी शर्मा ओली, महासचिव शंकर पोखरेल लगायतका नेता धनगढी पुगिसकेका छन् ।  तर सुदूरपश्चिमका प्रभावशाली नेता तथा एमालेका पूर्व उपाध्यक्ष समेत रहेका नेता भीम रावल भने आफ्नै गृह प्रदेशको अधिवेशनमा पनि निम्ता दिइएको छैन् । 

रावललाई नबोलाउन अध्यक्ष ओलीको निर्देशन रहेको बताइएको छ । उनी अधिवेशनमा बोलाउने आसमा घर बसिरहेका थिए । तर, उनलाई अधिवेशनको निम्ता नै दिइएन् । एमाले सुदूरपश्चिम प्रदेशको नेतृत्वका निम्ति तीन दाबेदार देखिएका छन् । तीन नेताले मुख्य पदको आकांक्षा व्यक्त गरेका हुन् ।

अध्यक्षका लागि कृष्णप्रसाद जैसी, कमल तिमिल्सिना र बचनबहादुर सिंहको दाबेदारी छ । जैसी एमाले सुदूरपश्चिम कमिटी सचिवालय सदस्य हुन् । गएको प्रदेशसभा सदस्य निर्वाचनमा उनी अछाम क्षेत्र नम्बर–१ ‘ख’ बाट उमेदवार बनेका थिए । तर, पराजित भए ।

अर्का दाबेदार राष्ट्रिय युवा संघका पूर्वअध्यक्ष सिंहले पत्रकार सम्मेलनमार्फत उमेदवारी घोषणा गरेका हुन् । गएको निर्वाचनमा उनी कञ्चनपुर क्षेत्र नम्बर–२ ‘क’बाट उमेदवार बनेका थिए । चुनाव जित्न सकेनन् । उनी सहमतिमा नेतृत्व चयन होस् भन्ने पक्षमा देखिन्छन् । उनले पनि पार्टी नेतृत्वसँगै छलफल गरेरै अघि बढेको बताए ।

आइतबार अधिवेशनको उद्घाटनका निम्ति पार्टी अध्यक्ष केपी शर्मा ओली धनगढी पुगिसकेका छन् । अधिवेशनबाट पाँच पदाधिकारीसहित १५५ सदस्यीय प्रदेश कमिटी चुनिनेछ । अधिवेशनमा ६६१ प्रतिनिधि छन् । अध्यक्षमा तीन आकांक्षी देखिएपछि नेताहरू सहमतिको प्रयासमा जुटेका छन् । तर सुदूरपश्चिमका प्रभावशाली नेता रावललाई निम्ता नदिएकोमा चर्चा सुरु भएको छ । 
 
अधिवेशनमा आमन्त्रण नगरेकाले आफू अधिवेशनमा सहभागी नभएको रावलले बताएका छन् । ‘म गृह जिल्ला अछाममै छु, मलाई अधिवेशनबारे कसैले जानकारी गराएको छैन । कुनै जानकारी नै नभई जाने कुरा भएन, रावलले भने । गत निर्वाचनमा एमाले अध्यक्ष केपी शर्मा ओलीले टिकट नदिएपछि रावल एमालेको राजनीतिमा सक्रिय छैनन् ।