आममाफी पाएका ढकालविरुद्धको रिटमा सुनुवाइ जारी

२५ असोज, काठमाडौं । कर्तव्य ज्यान मुद्दाका अभियुक्त  ‘रिगल’ भनिने योगराज ढकालको कैद माफीविरुद्धको रिट निवेदनमा सर्वोच्च अदालतमा सुनुवाइ सुरु भएको छ । प्रधानन्यायाधीश विश्वम्भरप्रसाद श्रेष्ठ तथा न्यायाधीशहरु आनन्दमोहन भट्टराई र कुमार रेग्मीको पूर्ण इजलासमा सुरू भएकाे सुनुवाइ अहिले जारी छ । 

बाँके नेपालगन्ज उपमहानगरपालिका-८ का २९ वर्षीय चेतन मानन्धरको हत्यामा जिल्ला अदालतबाट सर्वस्वसहित जन्मकैद पाएर जेलमा रहेका रिगलले सरकारको सिफारिसमा राष्ट्रपति रामचन्द्र पौडेलबाट यही असोज ३ मा बाँकी सजाय मिनाह पाएपछि त्यसविरुद्ध मानन्धर पत्नी भारती शेर्पा (मानन्धर)ले सर्वोच्चमा रिट निवेदन दायर गराएकी थिइन् । 

नेका तरुण दलका नेता समेत रहेका रिगल समेतको समूहले २०७२ असार २८ गते नेपालगन्जको सुर्खेत रोडस्थित धम्बोझी चोकनजिक नेपालगन्ज उपमहानगरपालिका–८ का २९ वर्षीय चेतन मानन्धरको खुँडाखुँडा प्रहार गरी ढकालको हत्या गरेको ठहर जिल्ला अदालतले गरेको थियो । मानन्धर हत्यापछि फरार भएका रिगलले घटनाको १ महिनापछि २०७२ भदौ ७ गते अदालतमा आत्मसमर्पण गरेका थिए ।

सर्वश्वसहित जन्मकैदको फैसलाअनुसार ढकाल २० वर्ष सजाय बस्नुपर्नेमा ५० प्रतिशत पनि कैद भुक्तान नगरी उनको कैद सजाय मिनाह गरिएको थियो । राम्रो चालचलन, आचरण देखाएका र तोकिएको कैद सजायमा पचास प्रतिशत भुक्तान गरिसकेका कैदीबन्दीलाई संविधान तथा गणतन्त्र दिवसको अवसरमा सरकारको सिफारिसमा राष्ट्रपतिबाट कैद माफी दिने व्यवस्था संविधानमा रहेको छ ।

तर रिगललाई दिइएको आममाफी संविधानविपरीत रहेको भन्दै बदरका लागि शेर्पाले रिट दिएकी हुन् । सरकारले रिगलजस्तै व्यक्ति हत्यामा जेल सजाय काटिरहेका सय भन्दा बढीलाई आममाफी दिएको पाइएको छ । यसबाट सरकारको चर्को आलोचना भइरहेको छ । 

यो पनि पढ्नुहोस