नेपाली भूमि कालापानी क्षेत्रमा भारतीय प्रधानमन्त्री मोदीको भ्रमणबारे संसदमा उठ्यो आवाज

२५ असोज, काठमाडौं । भारतीय प्रधानमन्त्री नरेन्द्र मोदीले नेपाली भूमि कालापानी क्षेत्रमा बिना जानकारी गरेको भ्रमणबारे संसद बैठकमा आवाज उठेकाे छ । बैठकमा भ्रमणबारे सांसदहरुले सरकारको जवाफ माग गरेका छन् । 

बिहीबार बसेको प्रतिनिधिसभाको बैठकको सुरुमै राष्ट्रिय स्वतन्त्र पार्टी (रास्वपा)का संसदीय दलका नेता रबि लामिछानेले मोदीको भ्रमणबारे सरकार मौन बसेको भन्दै तत्काल जवाफ दिन माग गरेका छन् । 

बैठकमा उनले मोदीको भ्रमण नेपालको चुच्चे नक्सामा समेटिएको दार्चुला जिल्लाको कुन्जी क्षेत्रमा आज बिहान भएको प्रवेश र यसबारे नेपाल सरकार र स्थानीय प्रशासनलाई जानकारी नभएको विषय गम्भीर भएको बताए ।
‘देशभित्र छिमेकी मुलुकका प्रधानमन्त्रीको भ्रमण हुँदा समेत सरकारलाई थाहा हुँदैन भने यो कस्तो तरिका हो ?’ उनले भने, ‘स्थानीय प्रशासनलाई सोध्दा भ्रमणबारे कुनै जानकारी नभएको जवाफ दिइएको छ, यत्रो ठूलो भ्रमण हुँदा सरकारलाई पत्तै नहुनु दुःखद् विषय हो । सरकारले तुरुन्त संसदलाई जानकारी दिन आवश्यक छ । सभामुखमार्फत सरकारको गम्भीर ध्यानाकर्षण गराउन चाहन्छु ।’

माेदीले बिहीबार बिहान नयाँ दिल्लीबाट हेलिकाेप्टर चढेर कालापानीकाे कुन्जी पुगेका छन् । उनले त्यहाँ रहेका मन्दिरमा पूजापाठ गरेका छन् । उनी आजै तिब्बतकाे मानसराेवर पुग्ने र फिर्तापछि स्थानीय नेपालीसँग छलफल गर्ने कार्यक्रम रहेकाे भारतीय संचारमाध्यमहरूले जनाएका छन्र । त्यहाँ माेदीले सुरक्षा निकायका अधिकारहरूसँग समेत छलफल गर्नेछन् ।

अहिले बैठक चलिरहेकाे छ । बैठकमा शून्य समयमा सांसदहरूले समसामयिक विषयमा सरकारकाे ध्यानाकर्षणा गराइरहेका छन् ।