कालापानीमा भारतीय प्रधानमन्त्रीको भ्रमणबारे जवाफ दिन सरकारलाई रुलिङ गर्न माग

२५ असोज, काठमाडौं । एमाले सांसद सूर्यबहादुर क्षेत्रीले नेपाली भूमि कालापानीमा बिना जानकारी भारतीय प्रधानमन्त्री नरेन्द्र मोदीले भ्रमण गरेकाबारे जानकारी दिन सरकारलाई रुलिङ गर्न सभामुख देवराज घिमिरेसँग माग गरेका छन् ।

बिहीबार जारी प्रतिनिधिसभाको बैठकमा विशेष समयमा बोल्दै सांसद क्षेत्रीले सरकार र स्थानीय प्रशासन थाहा नै नदिई भएको मोदीको भ्रमण आपत्तिजनक रहेको बताउँदै यसबारे संसदमा सत्यतथ्य जानकारी सरकारलाई रुलिङ गर्न सभामुख देवराज घिमिरेसमक्ष आग्रह गरे । 

मोदी आज बिहान राजधानी नयाँ दिल्लीबाट हेलिकोप्टर चढेर उतराखण्डका मुख्यमन्त्रीसहित कालापानीको कुन्जी क्षेत्रमा पुगेर मन्दिरमा पूजापाठ गरेका छन् । उनी आजै तिब्बतको मानसरोवर पुग्नेछन् भने फिर्ता भएर कुन्जी लगायतका स्थानीय नेपालीसँग छलफल गर्ने कार्यक्रम रहेको भारतीय संचारमाध्यमहरुले जनाएका छन् । 
सांसद बिनिता कठायतले मोदीको गुपचुप भ्रमणले के सन्देश दिन्छ भन्दै जवाफ दिन सरकारसँग माग गरिन् । नेपाली भूमिमा छिमेकी मुलुकका कार्यकारी प्रमुखबाट भएको गुपचुप भ्रमण गम्भीर रहेको बताइन् । 
सांसद मनिष झाले मोदीको भ्रमणबारे सरकार मौन बस्नु दुःखद रहेको बताए । नेपाली भूमिका मन्दिरमा पूजापाठ गरिनु अनुचित नभएपनि विधि प्रक्रिया पूरा भएनभएकाबारे सरकारले संसदमा जानकारी दिनुपर्ने बताए । 

यस्तै उनले व्यक्ति हत्यामा अदालतबाट सर्वस्वसहित जेल सजाय पाएका नेपालगन्जमा योगराज ढकाललाई सरकारले संविधानको दुरुपयोग गरेर आममाफी दिएको भन्दै यसबाट समाजमा दण्डहीनतालाई बढवा दिने काम भएको बताए ।