बैंकहरुले लुटेरा व्यवहार देखाएका छन्, नियन्त्रण नगरिए जनता चुप बस्दैनन् : सांसद साह

२५ असोज, काठमाडौं । प्रतिनिधिसभा सदस्य एवं सांसद प्रभु साहले बैंकहरुले ऋणीमाथि लुटेरा व्यवहार देखाएको बताएका छन् । बिहीबार प्रतिनिधिसभाको बैठकमा बोल्दै वाणिज्य र विकास बैंकहरुले ऋणीबाट चर्को ब्याज असुलेर लुट मच्चाइरहेको बताए । 

उनले सुरुमा कर्जा प्रवाह गर्दा थोरै ब्याज देखाएपनि केही महिनापछाडि नै मनोमानी तरिकाले २० प्रतिशतसम्म ब्याज असुल्ने काम गरिरहेको र त्यसमा नियमनकारी निकाय मौन बसेको भन्दै आपत्ति जनाए । कर्जा लिन समेत कमिशन र घुस खुवाउनुपर्ने विवशता ऋणीहरुले खेपिरहेको उनको भनाइ छ । 

‘ऋण लगानी गर्दा एकथरि ब्याज, केही समयपछि नै १५-२० प्रतिशतसम्म बढाउने व्यवहारले बैंकको लुट चरित्र उदांगो भएको छ’ उनले भने, ‘यतिबिघ्न ज्यादाति हुँदा सरकार के हेरेर बसिरहेको छ ? राष्ट्र बैंक कहाँ छ ?’ ऋण प्रवाह गर्दा १० प्रतिशत लगाएको ब्याज एकाध महिनामै चर्को ब्याज लगाएर ऋणीलाई आत्महत्याको तहमा पुर्याइएको उनको भनाइ थियो । 

उनले चर्को रुपमा लिएको ब्याज फिर्ता गर्न समेत माग गरे । ब्याज फिर्ता गर्ने र घटाउने काम नगरिए जनता सडकमा आउने बताए ।