दशैं नजिकिँदै जाँदा घर लिप्‍ने माटोको व्यापार बढ्दो

२८ असोज, काठमाडौं । हिन्दू धर्मावलम्बीहरुको मुख्य चाड बडादशैं नजिकिँदै गर्दा ग्रामीण क्षेत्रका स्थानीय बजारमा समेत लिप्ने रातो माटोको व्यापार बढेको छ ।

आइतबारबाट दशैंका घटनास्थापना सुरु भएसँगै पाँचथरको फिदिममा रातो माटो खन्ने, किन्ने र बेच्नेको भीड लागेको छ । दशैं र तिहारमा घर लिपपोत गर्नेहरु टाढा टाढाबाट फिदिममा आउँछन् । फिदिम बजारमा दशैंका किनमेलमा आएकाहरुले एक दुई बोरा माटो लिएर जाने गरेका छन् । 

केही स्थानीयले रुखो जमिन र रातो माटो भएका कारण खेती हुन नसकेको बाँझो जमिनबाट रातो खनेर बजारमा पु्याएर बिक्री गरिरेका छन् । फिदिमका चारखम्बे, रातमाटे र भदौरे लगायतका स्थानमा रातो माटो पाइन्छ । रातो माटोले लिपेका घर उज्याला र चम्किला हुने भएकाले रातो माटो स्थानीयकाे रोजाइमा परेको फिदिम बजारकी व्यापारी मिरा गुरूङ । सडक कुनामा माटाेले भरिएकाे बाेराकाे चाङ प्रशस्त देख्न सकिन्छ ।

यहाँ रातो माटो प्रतिबोरा एक सय देखि डेढ सय रुपैयाँमा बिक्री हुने गरेको व्यापारीहरु बताउँछन् । उनीहरुले माटो भर्नेलाई प्रतिबोरा २० रुपैयाँ दिने गरेका छन् । माटाे खन्न जेसिबीकाे समेत प्रयाेग गरिएकाे छ ।

फिदिमको माटोकोमाग तेह्रथुम, इलाम र ताप्लेजुङबाट समेत हुने गरेको उनीहरु बताउँछन् । दशैंमा घर लिपोत गर्ने, कमेरो (सेता) माटो छर्कने, सालको पातबाट बनेको टपरीमा भोज खाने प्रचलन कायमै छ ।