गठबन्धनको सरकार ढल्दैन, झनै मजुबत बनेर जान्छ : माधव नेपाल

२८ असोज, काठमाडौं । सत्तारुढ घटक नेकपा (एकीकृत समाजवादी)का अध्यक्ष माधव नेपालले वर्तमान गठबन्धनको सरकार कुनैपनि हालतमा नढल्ने बताएका छन् । उनले गठबन्धन झनै बलियो बन्दै गइरहेको बताए । 

आज सुर्खेतको वीरेन्द्रनगरमा आयोजित पार्टीको समाजवादी जागरण अभियानको कार्यक्रमलाई सम्बोधन गर्दै अध्यक्ष नेपालले गठबन्धन सरकार कसैले चाहना र इच्छा राखेको भरमा नढल्ने बताए । सरका ढाल्छु भने कसैले चुरीफुरी नगर्दा राम्रो हुने उनको भनाइ थियो । ‘कसैले पनि चुरीफुरी धेरै नगर्नुहोस् । कोशी प्रदेशको विषयलाई लिएर गठबन्धन ढल्छ कि भन्ने लागेको छ भने त्यो भ्रम बाहेक केही होइन’ उनले भने ।

उनले एकीकृत समाजवादीले जनताकै बीचमा रहेर समाजवादका आधार तयार पार्ने काम गरिरहेको र आगामी दिनमा थप सशक्त बनाउँदै लैजाने बताए । उनले पार्टीले सरकारले भ्रष्टाचार र विसंगतिविरुद्ध चालिरहेको कदममा भरपूर साथ दिने र बेथितिलाई ठेगान लगाउने बताए । 

गठबन्धनका मुख्य घटक नेपाली कांग्रेसको कोशी प्रदेश सभासदस्यमध्ये ८ जनाले प्रमसख प्रतिपक्ष एमालेको साथ लिएर आइतबार प्रदेश सरकार गठन गरेपनि गठबन्धनको केन्द्र सरकारमा पनि असर पर्ने र सरकार भत्काउने खेल सुरु हुने अडकलबाजी चलिरहेका बेला सरकार एक घटक दलका अध्यक्ष समेत रहेका नेपालले सरकार नढल्ने विचार राखेका हुन् ।