काठमाडौंमा थप ३ ठाउँमा वान वे

२९ असोज, काठमाडौं । काठमाडौं महानगरपालिकाले महानगर क्षेत्रमा थप ३ स्थानमा एकतर्फी (वान वे) बनाएको छ । यस क्षेत्रमा कार्तिक १ गतेदेखि वान वे लागू हुने महानगरपालिकाले आज एक सूचना प्रकाशित गरेर बैखाले सवारी साधन एकतर्फी संचालनबारे जानकारी दिएको छ । 

सूचनाअनुसार काठमाडौँ महानगरपालिका वडा नं ११ त्रिपुरेश्वर मूल सडक खण्डको दक्षिणतर्फ त्रिपुरेश्वरबाट गुसिंगाल–सेतोपुल–मिलन मार्गतर्फ जान मात्र पाउनेछ । वडा नं २८ पुतलीसडक, मूलसडक खण्डको पश्चिमतर्फ कमलादी मोडबाट घण्टाघरतर्फ जान मात्र पाउनेछ । 

यस्तै, वडा नं १ र २८ मा पर्ने दरवार मार्ग मूल सडकको पूर्वतर्फ महेन्द्र शालिकदेखि कृष्ण पाउरोटी चोक (कमल पोखरीसम्म जान मात्र पाउनेछ । वान वेन सडककोे दुवै विन्दुमा ट्राफिक सिंग्नल राखिनेछ । 

यसअघि माइतीघर–पुतलीसडक, डिल्लीबजार–ग्यालेक्सी स्कूल गेट, धरहरा–भोटेबहाल, घण्टाघर–शहिदगेट–रत्नपार्क लगायत विभिन्न क्षेत्रमा साना गल्लीहरुमा वान वेको व्यवस्था छ । वान वेन सवारी दाेहाेराे सवारी चलाउनेमाथि ट्राफिकले १५०० रूपैयाँसम्म जरिवानाकाे चिट काट्दै आइरहेका छन् ।