‘देशको समृद्धि र जनताकाे अधिकार सुनिश्चित कम्युनिस्टबाहेक कसैले गर्न सक्दैन’

२९ असोज, काठमाडौं । नेपाल कम्युनिस्ट पार्टी (नेकपा)का महासचिव नेत्रविक्रम चन्द ‘विप्ल’ले देशको समृद्धि र नागरिकको अधिकार सुनिश्चितता कम्युनिस्टबाहेक अरु कसैले गर्न नसक्ने बताएका छन् । 

माजवादी मोर्चा नेपालले आज सुदूरपश्चिम प्रदेशको धनगढीमा आयोजना गरेको संदेश सभालाई सम्बोधन गर्दै महासचव विप्लवले देशमा राष्ट्रिय स्वाधीनताको रक्षा र नागरिकलाई पूर्ण अधिकार सम्पन्न बनाउने काम कम्युनिष्टबाहेक कसैले पूरा गर्न नसक्ने बताए ।

उनले अहिले मुलुकमा विभिन्न पार्टीको नामबाट भ्रष्टाचारी, तस्कर र राष्ट्रद्रोहीहरुले शासन गरिरहेको बताउँदै यसलाई विस्थापित गरेर कम्युनिष्टले शासन चलाउनु पर्ने बताए । गलत मान्छेहरुको हातमा सत्ता रहेसम्म मुलुकमा राष्ट्रघाती सम्झौता हुने र नागरिक अभाव र तनावमा बस्न विवश हुने उनले बताए । 

उनले देश र नागरिकको दुःख हटाउन समाजवादको स्थापनाका गर्न समाजवादी मोर्चा गठन भएको स्पष्ट पारे । मोर्चा देश र जनताका हरेक समस्या समाधान गर्न तयार रहेको उनको भनाइ थियो । वर्तमान संसदीय व्यवस्था कायम रहेसम्म देशमा युवा शक्ति विदेश पलायन हुने क्रम नरोकिने र यसले देशलाई अकल्पनीय क्षति पु्याउने अवस्था आएको बताए । उनले हरेक नेपालीले कठोर श्रम गर्ने र आप्नै पसिनामा बाँच्न सके मात्र मुलुकको भविष्य उज्यालो बन्ने बताए । राष्ट्र र जनताविराेधी कुनैपनि सम्झाैता स्वीकार्य नहुने उनले बताए ।

सभामा मोर्चामा आवद्ध दलका नेताहरुले सम्बोधन गरेका छन् । संसदीय प्रणालीबाट बाहिर रहेकाे नेकपासहित सरकारकाे नेतृत्व गरिरहेको माओवादी केन्द्रसहित ४ दल सम्मिलित मोर्चाले ७ वटै प्रदेशमा सन्देश सभा सम्पन्न गरेको छ ।