धनगढी पुगेर माधव नेपालले भने- ‘समाजवादी मोर्चा बनेपछि मुलुकमा तरंग पैदा भयो’

२९ असोज, धनगढी । नेकपा (एकीकृत समाजवादी)का अध्यक्ष माधवकुमार नेपालले ४ दल एक भएर समाजवादी मोर्चा बनेपछि देशमा राजनीतिक तरंग गएको बताएका छन् । 

मोर्चाले आज कैलालीको धनगढीमा आयोजना गरेको सन्देश सभालाई सम्बोधन गर्दैउनले राष्ट्रमा समाजवाद स्थापनाका लागि मोर्चाले नेतृत्व लिने बताए । उनले मोर्चाको गठनपछि विकास र समृद्धिविरोधीको सातो गएको बताए । उनले मोर्चामा सबै वामपन्थीलाई अटाउन सकिने बताए । 

राजनीतिक स्थिरता विराेधी र भ्रष्ट्रचार पक्षधरले मोर्चाविरुद्ध गलत हल्ला फैलाइरहेको भन्दै अध्यक्ष नेपालले मोर्चासँग डराउनुपर्ने कुनै कारण नभएको बताए । मोर्चा श्रमिक जनताको असल संगठन भएको उनको भनाइ थियो । 

सभालाई मोर्चामा आवद्ध ४ दलका शीर्ष नेताहरुले सम्बोधन गरेका छन् । मोर्चामा माओवादी केन्द्र, जसपा, एकीकृत समाजवादी र संसदीय प्रणालीबाहिर रहेको नेकपा सम्मिलित छन् । मोर्चाले सात वटै प्रदेशमा प्रदेश स्तरीय सन्देशसभा पूरा गरेको छ ।