गेटामा भोलिदेखि १०० शैय्याकाे अस्पताल सञ्चालन हुने

३० असोज, काठमाडौं । कैलालीको धनगढीमा रहेको गेटामा भोलिबाट अस्पताल सञ्चालन हुने भएको छ। एक सय बेड क्षमताको अस्पताल सञ्चालनका लागि सबै तयारी पुरा भएपछि अस्पताल सञ्चालन गर्ने भएको हो । 

गेटा मेडिकल कलेज, स्वास्थ्य विज्ञान प्रतिष्ठानपछि विश्वविद्यालय घोषणा गरिएयता अस्पताल सञ्चालनमा आउन लागेको हो । अस्पताल संचालनका लागि आवश्यक बजेट, कर्मचारी व्यवस्थापन, स्वास्थ्य उपकरण औषधि लगायतको प्रबन्ध भइसकेको अस्पतालका निर्देशक डाक्टर प्रमोद जोशीले बताए । 

अस्पताल सञ्चालनका लागि सहकायक स्तर र श्रेणीविहीन गरेर एक सय १० जना र नेपाल सरकार मन्त्रीपरिषदको २०८० असोज १६ गतेको निर्णयअनुसार राजपत्राकिंत तथा अधिकृत स्तर ३१ जनाको अस्थायी दरबन्दी संरचना स्वीकृत भएको छ । 

आर्थिक वर्ष २०८०/८१ को बजेटमा गेटा अस्पताललाई एक सय बेड क्षमताको अस्पतालको रुपमा विकास गर्न पूर्वाधार निर्माण, उपकरण खरिद र जनशक्ति व्यवस्थापनका लागि बजेट व्यवस्थापन गरिएको थियो ।