कोशीमा कांग्रेस विद्रोह समाप्त भइसक्योः थापा

१ कात्तिक, विराटनगर । कोशी प्रदेशका पूर्वमुख्यमन्त्री तथा कांग्रेस सांसद उद्धव थापाले कांग्रेसमा विद्रोह गरेर मुख्यमन्त्री बनेका केदार कार्कीसँग दुष्मनी सकिएको बताएका छन् । पार्टीमा विद्रोह गर्ने सांसदहरूसँग अब सौहार्द वातावरण बनेको थापाको भनाइ थियो । कार्की मुख्यमन्त्री बनेपछि कांग्रेस कोशी प्रदेशसभा संसदीय दलको नेताबाट राजीनामा दिएका थापाले अब मिलेर अगाडि बढ्नुपर्ने बताए ।

कांग्रेस दलबाट ८ भाइ हाम्रा माननीयहरूले सरकार निर्माणका निमित्त मुख्यमन्त्री बन्ने कुरामा दलभित्र झगडा गर्नुभयो, कराउनु भयो, कुण्ठा बोकेर हिँड्नुभयो, संघर्ष गर्नुभयो, अन्तिममा युद्धको मैदानमा पनि पुग्नुभयो र युद्ध पनि जितेर आउनु भयो, उनले भने । युद्ध जितेर आइ सकेपछि हामीले गला लगाउने भन्दा अर्को कुरा छैन, कार्कीले भने । 

एमालेलाई सरकारमा सहभागिताबारे सोच्न पनि थापाले आग्रह गरेका छन् । उनले कार्की मुख्यमन्त्रीमा गठबन्धनको साझा उम्मेदवार रहेको पनि बताए । कोशी प्रदेशमा सरकार गठनलाई समस्याको रूपमा हेर्दा अस्थिरता उत्पन्न भएको थापाको भनाइ थियो । उनले अहिले समाधान निस्किएको बताए ।

’विश्वासको मत लिने–दिने भन्दा पनि प्रमुख विषय समाधान रहेछ । कसरी यो समस्याको समाधानमा पुग्न सक्छौं भन्ने कुरालाई परबाट हेरिरह्यौं,’ उनले भने, ’हाम्रा मुख्यमन्त्री केदार कार्की बन्दै गर्दा, एमालेको समर्थन प्राप्त गर्दै गर्दा हामी समाधानमा पुगेका छौं । समाधानको पाटोमा अब प्रदेश अगाडि बढेको जस्तो लाग्छ ।’

बजेट पारित गर्नका लागि सबै दलहरू एकताबद्ध हुनुपर्ने थापाको आग्रह थियो । विगतमा सञ्चालन भएका, भुक्तानी बाँकी रहेका र बजेट पुस्तिकाबाट आस्थाका आधारमा हटाइएका योजनाहरूलाई समाधान दिनुपर्ने थापाको आग्रह थियो । उनले पहिचानको मुद्दा अहिले पनि जीवितै रहेको र जुनसुकै बेला सडकमा आन्दोलन हुनसक्ने कुरालाई सरकारले ध्यान दिनुपर्ने बताए । उनले वार्ता गर्नका लागि समिति गठन गर्नुपर्ने सुझाए ।