मंगलबारको बैठकमा औपचारिक पोसाक लगाएर आउनूः सभामुख

१२ कात्तिक, काठमाडौं । सभामुख देवराज घिमिरेले आउँदो मंगलबार बस्ने संघीय संसद्को संयुक्त बैठकमा औपचारिक पोसाक लगाएर उपस्थित हुन निर्देशन दिएका छन् । 

आइतबार प्रतिनिधिसभा बैठकमा सभामुख घिमिरेले सो दिन संयुक्त राष्ट्रसंघका महासचिव एन्टोनियो गुटेरेसले सम्बोधन गर्ने भएकाले औपचारिक पोसाकमा उपस्थित हुन सांसदहरूलाई निर्देशन दिएका हुन् । 

गुटेरेसले मंगलबार अपराह्न ४ बजे संसद्मा सम्बोधन गर्नेछन् । सभामुख घिमिरेले उक्त दिन दिउँसो ३ः४५ बजे संसद् भवनभित्र पसिसक्न पनि सांसदहरूलाई भनेका हुन् । यही कात्तिक १६ गते बिहान ११ बजे बस्ने गरी आजको प्रतिनिधिसभा बैठक स्थगन गरिएको उनले जानकारी गराए ।