राष्ट्र बैंकले फेरी ल्यायो २७ अर्ब ६६ करोडको ट्रेजरी बिलः आज बोलकोबोल, मंगलबार वितरण

१३ कात्तिक, काठमाडौं । नेपाल राष्ट्र बैंकले सोमबार आन्तरिक ऋण प्रयोजनका लागि २७ अर्ब ६६ करोड रुपैयाँ बराबरको ट्रेजरी बिल बिक्रीका लागि बोलकबोल आहृवान गरेको छ । परिपक्व अवधि सकिएका ट्रेजरी बिल पुनः बिक्रीका लागि राष्ट्र बैंकले बोलकबोल आहृवान गरेको हो । बैंकद्वारा सूचनामा २७ अर्ब ६६ करोड रुपैयाँ बराबरको ट्रेजरी बिल नविकरण गर्ने भनिएको छ । 

जसअनुसार ५ अर्ब रुपैयाँको २८ दिने, ८ अर्ब १० करोड रुपैयाँको ९१ दिने, १३ अर्ब रुपैयाँको १८२ दिने र १ अर्ब ५६ करोड रुपैयाँ बराबरको ३ सय ६४ दिने ट्रेजरी बिलका लागि बोलकबोल मागिएको छ । ट्रेजरी बिलका लागि राष्ट्र बैंकले आज सोमबार दिउँसो ३ बजेसम्म बोलकबोल गर्न आग्रह गरेको छ । राष्ट्र बैंकका अनुसार कात्तिक १४ गते मंगलबार ट्रेजरी बिल वितरण गरिनेछ ।

पछिल्लो पटकको बोलकबोलमा ५.९ प्रतिशत भारित औसत ब्याजदर तय भएको छ । बैंक तथा वित्तीय संस्थाले सबैभन्दा बढी ५.९५ प्रतिशत र सबैभन्दा कम २.६१ प्रतिशत ब्याजदरमा बोलकबोल गरेका थिए । राष्ट्र बैंकले यसअघि आन्तरिक ऋण संकलन गरेकोमध्ये परिपक्व अवधि पुगेका ट्रेजरी बिल पुनः विक्री गरिरहेको छ । 

सोही क्रममा सरकारले केही ट्रेजरी बिलको पैसा भुक्तानी गरेको छ भने केहीको पुनः बिक्री गरिएको हो । बैंक तथा वित्तीय संस्थामा निक्षेक रकम बढिरहेकाले त्यसलाई खिच्न पहिलो र दोस्रो त्रैमासमा तोकिएभन्दा बढी आन्तरिक ऋण राष्ट्र बैंकले उठाइरहेको छ ।