मर्यादाक्रममा सभामुखभन्दा अगाडि परे प्रधानन्यायाधीश

१३ कात्तिक, काठमाडौं । विधायन समितिले राष्ट्रिय मर्यादाक्रम सम्बन्धी विधेयक संशोधनसहित पारित गरेको छ । सोमबार बसेको राष्ट्रिय सभा अन्तर्गतको विधायन समितिले यो विधेयक पारित गरेको हो । अब चार नम्बरको मर्यादा क्रममा रहेका सभामुख पाँच नम्बरमा परेका छन् । 

मर्यादा क्रमको पाँचौँ नम्बरमा राखिएका सर्वोच्च अदालतका प्रधानन्यायाधीश विधेयक समितिबाट चार नम्बरमा सार्ने संशोधनसहित पारित भएको छ ।  समितिले संशोधनसहित तयार पारेका प्रतिवेदन राष्ट्रिय सभाको मंगलबारको बैठकमा पेस गर्ने निर्णय गरेको छ ।

यसअघि, सभामुखलाई चौथो नम्बरमा राखेर प्रधानन्यायाधीशलाई पाँचौँ वरीयतामा राख्न विधेयकमा प्रस्ताव गरिएको थियो । उक्त विधेयक राष्ट्रिय सभाका सदस्यहरूले ०७९ चैत ५ मा गैरसरकारी विधेयकका रुपमा ल्याएका थिए । विधेयक राष्ट्रिय सभाका सदस्यहरू गोपी आछामी, तुल विक, देवेन्द्र दाहाल, प्रकाश पन्थ प्रमिला कुमारी, वेदुराम भुसाल, रमेशजंग रायमाझी र शेखर सिंहले संयुक्त रुपमा लगेका थिए ।