यो वर्ष नेपालमा पर्यटकको उत्साहजनक उपस्थिति

१५ कात्तिक, काठमाडौं । नेपालमा पर्यटक आगमनमा उत्साहजनक देखिएको छ । पर्यटन बोर्डका अनुसार सन् २०२३ को अक्टोबरमा मात्रै १ लाख १७ हजार ३०६ जना पर्यटक नेपाल भित्रिएका छन् । यो एक महिनामा नेपाल भित्रिएका पर्यटकको संख्या इतिहासमा धेरै हो । 

नेपाल पर्यटन बोर्डका अनुसार अक्टोबर २०१९ मा आएको १ लाख १३ हजार संख्या एक महिनामा आएका पर्यटकको सबैभन्दा ठूलो संख्या थियो । यो रेकर्ड यस वर्ष तोडिएको हो । अक्टोबर महिनामा गैरआवासीय नेपालीको जमघट भएको थियो । उनीहरु समेत नेपाल आउँदा पर्यटकका रुपमा गणना गरिएको छ । यो सम्मेलनको प्रभावसमेत यस महिनामा परेको देखिन्छ ।

बोर्डका अनुसार भारत, बंगलादेश, चीन, श्रीलंकासहितका मुलुकबाट धेरै पर्यटक नेपाल आएका छन् । नेपाल पर्यटन बोर्डका अनुसार अक्टोबर २०२२ मा ५२ हजार १२१, २०२१ मा १५ हजार ७१५ र सन् २०२० मा १ हजार ८३१ जना पर्यटक नेपाल आएका थिए । यस महिनामा सबैभन्दा धेरै भारतबाट १८ हजार ४८० जना पर्यटक नेपाल आएका छन् । 

दोस्रो स्थानमा अमेरिकी छन् । अमेरिकाबाट १४ हजार ८७९ जना पर्यटक नेपाल आएको तथ्यांक छ । तेस्रो स्थानमा बेलायती छन् । यस मुलुकबाट ८ हजार २१७ जना पर्यटक नेपाल आएका छन् । चीनबाड ६ हजार ८८०, अष्ट्रेलियाबाट ६ हजार ७५, जर्मनीबाट ५ हजार ९१६, फ्रान्सबाट ५ हजार २७१, बंगलादेशबाट ४ हजार २९२, श्रीलंकाबाट २ हजार ५०७ र इटालीबाट २ हजार ४६७ जना पर्यटक नेपाल आएका छन् ।

सन् २०२३ को १० महिनाको अवधिमा ८ लाख पर्यटक नेपाल भित्रिएका छन् । नेपाल पर्यटन बोर्डका अनुसार जनवरीदेखि अक्टोबरको बीचमा ८ लाख ९ हजार ६७८ जना पर्यटक नेपाल आएका छन् ।