विराटनगरमा १३ तोला सुन र ९९ केजी चाँदी बरामद

१६ कात्तिक, विराटनगर । विराटनगरको पिचरामा १३ केजी सुन र ९९ तोला चाँदी प्रहरीले बरामद गरेको छ । विराटनगर–११ पिचरास्थित पशुपति ज्वेलर्सबाट ९९ किलो ९९४.५ ग्राम चाँदी र १३ तोला सुन  बरामद गरिएको प्रहरीले जनाएको छ । 

प्रहरीले उक्त ज्वेलर्सका सञ्चालक विश्वजीत जनालाई पनि नियन्त्रणमा लिएको छ । सुनचाँदी पसलबाट बिहीबार दिउँसो तस्करीको चाँदीका गरगहना बरामद भएको हो । पक्राउ परेका सञ्चालकलाई विराटनगर भन्सार कार्यालयमा राखिएको छ ।  पक्राउ परेका जाना भारतीय नागरिक हुन् । उनले पिचरामा सुनचाँदीको पसल सञ्चालन गर्दै आएका थिए । 

विराटनगर भन्सार कार्यालय, मोरङ प्रहरी र सशस्त्र प्रहरीले संयुक्त रुपमा छापा हानेर चाँदी बरामद गरेको हो । बरामद गरिएको चाँदीको बिलबिजक नभएको र चाँदीको गरगहना पाँच वटा प्लाष्टिकको बोरामा हालेर लगिएको प्रहरीले जनाएको छ ।