भूकम्प प्रभावित क्षेत्रमा गएका प्रधानमन्त्रीको जनस्तरबाटै आलोचना

१८ कात्तिक, काठमाडौं । गए राती जाजरकोट र रुकुम पश्चिममा गएको भुकम्पले पुर्याएको क्षति अवलोकन गर्न हेलिकोप्टरमा स्वास्थ्यकर्मीको टोली लिएर त्यसतर्फ गएका प्रधानमन्त्री पुष्पकमल दाहाल प्रचण्डको जनस्तरमै आलोचना भएको छ । परिस्थितिको व्यवस्थापन गर्नुपर्ने प्रधानमन्त्री पर्यटक जस्तो घुमेको भन्दै उनको आलोचना भएको हो । 

सामाजिक स्तरमा भएको आलोचनाप्रति प्रधानमन्त्रीको सचिवालयको पनि ध्यानाकर्षण भएको छ । सचिवालयले प्रधानमन्त्रीको बचाउ गरेको छ । प्रधानमन्त्री हेलिकोप्टर लिएर प्रभावित क्षेत्रमा जाँदा केन्द्रबाट जनशक्ति कसरी परिचालन गर्ने भन्ने अन्योल भएको छ । बिहान अबेरसम्म नेपाल प्रहरी र नेपाली सेनादेखि हवाई क्षेत्रका सञ्चालकहरु भूकम्प क्षेत्रको उद्धारमा कसरी जाने भन्ने अन्योलमा थिए ।    

कतिपय राजनीतिक कार्यकर्ता तथा सर्वसाधारणले प्रधानमन्त्री प्रकोपका बेला पर्यटन गर्न गएको भन्दै आलोचना गरिरहेका छन् । उनीहरूले यस्तो बेला आफ्नो टिम, सेना प्रहरीको लावालस्कर लगाएर हिँड्ने होइन भन्दै सामाजिक सन्जालमार्फत् सुझाव दिएका छन् ।

यता, प्रधानमन्त्रीको सचिवालयले भने शुक्रबार रातीको जाजरकोट भुकम्पमा ठूलो जनधन क्षति भएको थापा पाएपछि प्रधानमन्त्री पुष्पकमल दाहाल प्रचण्डले राज्यको निकाय परिचालनका अतिरिक्त आफ्नो व्यक्तिगत सक्रियता  देखाएको बताएको छ । 

प्राकृतिक विपद्का बेला सरकारको प्रमुख आफैं सक्रिय हुँदा नागरिकमा भरोसा जागृत हुने ठानेर प्रधानमन्त्री शनिबार बिहानै भुकम्पका मुख्य प्रभाव क्षेत्र जाजरकोट हुँदै रुकुम गएको सचिवालयको भनाइ छ । प्रधानमन्त्रीले अरु नियमित भ्रमणमा जस्तो सचिवालयका सदस्य, सल्लाहकार, सुरक्षाकर्मी नलगेको, भूकम्पपीडित, घाइते आदिका लागि तत्कालै चिकित्सा सहयोग पुगोस् भनेर डाक्टर, स्वास्थ्यकर्मीहरू र औषधी लगेर गएको प्रधानमन्त्री सचिवालयको भनाइ छ । 

अरू भ्रमणमा जस्तो फोटोग्राफर लगायत टिम कोही पनि नगएको, केवल स्वास्थ्य टोली मात्रै गएको बालुवाटारले जानकारी दियो । ‘उद्धार, राहतलगायत तत्कालै गर्नुपर्ने काम अझै प्रभावकारी हुन सकोस् भनेर सिंगो टिमको परिचालनमा सहयोग तथा निर्देशनका लागि प्रधानमन्त्रीज्यु जानुभएको हो,’ प्रधानमन्त्री सचिवालयले भनेको छ, तत्काल आवश्यकता पूर्तिका लागि डाक्टर र स्वास्थ्यकर्मी आफैं लगेर जानुभएको छ । 

अरू टोली पनि पठाउने काम हुँदैछ । संघ, प्रदेश, स्थानीय तीनै तहका सरकारलाई आपसमा समन्वय गर्ने तथा सुरक्षाकर्मीलगायत अरू निकायसँग चुस्त समन्वय मिलाउने काम प्राथमिक हो । जाजरकोटबाट प्रतिनिधित्व गर्ने सांसद तथा ऊर्जामन्त्री शक्ति बस्नेत, रुकुमबाट प्रतिनिधित्व गर्ने माओवादी नेता जनार्दन शर्मा, कांग्रेस नेता राजीवविक्रम शाह टोलीमा सहभागी छन् ।