भूकम्प पीडितका लागि गृहमन्त्रालयले दुई जिल्लालाई तत्कालै १० करोड दिने

१८ कात्तिक, काठमाडौं । शुक्रबार राती जाजरकोट केन्द्रबिन्दु बनाएर गएको भूकम्प पीडितका लागि संघीय सरकारले १० करोड दिने भएको छ । भुकम्पबाट मध्यराती ठूलो क्षति भएकोमा गृह मन्त्रालयले दुई जिल्लालाई तत्कालै १० करोड दिने भएको हो । जाजरकोट र रुकुमपश्चिममा ठूलो जनधनको क्षतिको छ । 

भूकम्पपीडितको उद्धार तथा राहतका लागि जाजरकोट र रुकुमपश्चिम दुवै जिल्लाका विपद् कोषण्मा ५÷५ करोड निकासा गर्ने निर्णय पनि गरेको गृह मन्त्रालयलका प्रवक्ता नारायण भट्टराईले जानकारी दिए । गृहमन्त्रालयमा आज बिहान बसेको आकस्मिक बैठकले रकम निकासा गर्ने लगायतका राहत र उद्धार तथा घाइतेको निःशुल्क उपचारसम्मको निर्णय गरेको हो । 

बिहान १० बजे गृह मन्त्रालयमा बैठकमा स्वास्थ्य मन्त्रालय, परराष्ट्र मन्त्रालय, प्रधानमन्त्री कार्यालय, भौतिक योजना मन्त्रालय, संघीय मामिला मन्त्रालय, नेपाली सेना र मातहतका सुरक्षा तथा उद्धार निकायको प्रतिनिधित्व रहेको थियो । शुक्रबार राति जाजरकोटको बारेकोट गाउँपालिका–१ रामिडाँडा केन्द्रबिन्दु बनाई गएको ६ दशमलव ४ म्याग्निच्युडको भूकम्पले जाजरकोट र पश्चिम रुकुमका कतिपय ठाउँमा अकल्पनीय मानवीय र भौतिक क्षति भएपछि सुरक्षा संयन्त्रहरू रातिदेखि नै उद्धारमा जुटेको मन्त्रालयले जनाएको छ । 

गृह मन्त्रालयले नेपाली सेनाको हेलिकप्टरमार्फत प्रारम्भिक राहत सामाग्री पठाइसकेको प्रवक्ता नारायण भट्टराईले बताए । उनका अनुसार नेपाली सेना, नेपाल प्रहरी र सशस्त्र प्रहरी बलका जाजरकोट, पश्चिम रुकुम, पूर्व रुकुम, रोल्पा, सुर्खेत, बाँके र दाङका टोलीहरू उद्धारमा खटिएका छन् । ती जिल्लाका मेडिकल टिमहरू समेत घटनास्थलमा पुगिसकेका छन् ।  

सुरक्षा निकायको स्थानीय मेडिकल टिमका अतिरिक्त सशस्त्र प्रहरी अस्पताल, वीर अस्पताल र सैनिक अस्पतालबाट गरी ११ जनाको मेडिकल टोली बिहानै स्काई ट्रकमार्फत घटनास्थलमा पुगिसकेको पनि भट्टराईले जानकारी दिए । उनका अनुसार सूर्खेत, नेपालगन्ज, काठमाडौ लगायतका स्थानमा घाइतेको उपचार गर्ने व्यवस्था समेत मिलाइएको छ ।