सशस्त्रले टेन्ट र पालसहित  तीन वटा कन्टेनर भुकम्प प्रभाबित क्षेत्रमा पठायो

१९ कात्तिक, काठमाडौं । भूकम्प पीडितहरुको लागि सशस्त्र प्रहरी बलले तीन वटा डिजास्टर रेस्पोन्स सिस्टम कन्टेनर टेन्ट र पाल लिएर त्यसतर्फ टोली पठाएको छ । 

सशस्त्र प्रहरी सहायक निरीक्षक रामविश्वास यादवसहितको सुरक्षा फौज आइतबार बिहान करीव पौने ४ बजे तीन वटा कन्टेनरमा १० हजार पाल र ७ सय थान डोम टेन्ट लिएर पश्चिम रुकुमको लागि हिडेको छ ।  

उपत्यका स्थित सशस्त्र प्रहरी बल नेपाल नं. २० विपद् उद्धार उपत्यका गणमा रहेको ७ सय थान टेन्ट र नं. २२ गुहेश्वरी गणमा भक्तपुरमा रहेको १० हजार पाल लिएर  ३ वटा कन्टेनर गएको सशस्त्र प्रहरी बल नेपालका प्रवक्ता सशस्त्र प्रहरी वरिष्ठ उपरीक्षक राजेन्द्र खड्काले बताए  ।

 यसअघि भुकम्प पीडितहरुको लागि आवश्यक सामाग्रीसहित दाङबाट पश्चिम रुकुम र सुर्खेतबाट जाजरकोटको लागि दुई वटा डिजास्टर रेस्पोन्स सिस्टम कन्टेनर पठाई सकिएको वरिष्ठ उपरीक्षक खड्काले जानकारी दिए  । आज पनि भुकम्प प्रभावित क्षेत्रमा सशस्त्र प्रहरी बलले उद्धार कार्य जारी राखेको छ ।