राहतको स्थलगत अनुगमन गर्न कांग्रेसले खटायो टोली

२२ कात्तिक, काठमाडौं । नेपाली कांग्रेसले जाजरको भूकम्पबाट प्रभावित जिल्लाका पीडितहरुले सरकारले वितरण गरेको राहत पाए नपाएको अनुगमन गर्न पार्टीका नेताहरुलाई स्थलगत रिपोर्टिङ पठाएको छ । बुधबार महामन्त्रीद्वय विश्वप्रकाश शर्मा र गगन थापाको नेतृत्व कांग्रेसले टोली खटाएको हो ।
 
महामन्त्रीद्वयको नेतृत्वमा कांग्रेसका सांसद, केन्द्रीय सदस्यहरु सहभागि हुनेछन् । टोलीमा प्रभावित जिल्ला र क्षेत्रका नेता तथा सांसदहरुलाई सहभागि गराइएको छ । भूकम्पले प्रभावित क्षेत्रका पार्टीका भातृ संगठनमा आवद्ध नेता तथा कार्यकर्ताहरुलाई राहतमा खटिन कांग्रेसले निर्देशन दिइसकेको छ ।  

मुख्यसचिव कृष्णप्रसाद पौडेलका अनुसार जाजरकोट भूकम्पबाट स्वदेश र विदेशमा रहेका समस्त नेपाली मर्माहत र स्तब्ध भएको स्थितिमा यो विपत्तिको सामना सबै राजनैतिक आग्रह पूर्वाग्रह भन्दा माथि उठेर एकताबद्ध भएर गर्नुपर्ने भएकलो कांग्रेसले उद्धार, राहत र पुनस्र्थापनाको वास्तविक अवस्था बुझ्न केन्द्रीय अनुगमन तथा व्यवस्थापन सहजीकरण समिति गठन गरेको र त्यही मातहतको टोली अनुगकनमा गएको हो ।

महामन्त्रीद्वय गगन थापा र विश्वप्रका शर्माको नेतृत्वमा गठन भएको समितिले उद्धार कार्यमा स्थानीय पार्टीपंक्ति परिचालन गर्नेछ भने सरकारको राहत कोषमा ५० लाख रुपैयाँ सहयोग घोषणा र हस्तान्तरण गरिसकेको छ । सो स्थानमा चिकित्सक र औषधीसहित पुगेर आवश्यक प्रबन्ध गर्ने पनि जनाइएको छ । महामन्त्रीद्वयको नेतृत्वमा रहेको समितिले जाजरकोट र पश्चिम रुकुम पुगेर सात बुँदे कार्यमा ध्यान केन्द्रित गर्ने कांग्रेसले जनाएको छ ।

यस्तै नेपाली कांग्रेसका सांसदहरुको छुट्टै एक टोली पनि जाजरकोट भूकम्पले पुर्याएको क्षतिको स्थलगत अनुगमन गर्न त्यसतर्फ जाने भएको छ । प्रतिनिधिसभा अन्तर्गतका विभिन्न समितिमा रहेका कांग्रेसका सांसदहरु अनुगमनमा जान लागेका हुन् । उनीहरु सरकारी खर्चमा नभइ व्यक्तिगत खर्चमा जान लागेको नेपाली कांग्रेसका नेता तथा राज्यव्यवस्था समितिका सभापति रामहरी खतिवडाले जानकारी दिए ।