सम्भवत सर्वोच्चले शुक्रबार न्यायाधीश पाउँदै, नियुक्ति हुन दौडधुप

२३ कात्तिक, काठमाडौं । लामो समयदेखि न्यायाधीशको अभाव झेल्दै आएको सर्वोच्च अदालतले शुक्रबार न्यायाधीश पाउने संभावना देखिएको छ । बिहीबार न्यायपरिषदमा उठेको विवाद मिलाउन सके शुक्रबार सर्वोच्चमा न्यायाधीश र उच्च अदालतमा मुख्य न्यायाधीश सिफारिस हुनेछन् ।  

बिहीबार न्यायपरिषदले न्यायाधीश नियुक्तिको प्रक्रिया सुरु गरेसँगै नियुक्ति खानेको दौडधूप बाक्लिएको छ र आकांक्षी संख्या न्यूनीकरणका निम्ति न्यायपरिषदले केही मापदण्डहरु बनाएको छ । यसअघि सर्वोच्चको न्यायाधीशका लागि लिष्टमा परेका केही कानुनव्यावसायी र उच्च अदालतका न्यायाधीशहरू रिङबाट आउट भएका छन् । 

हाल सर्वोच्चमा सात र उच्च अदालतमा एक मात्र मुख्य न्यायाधीश छन् । करिब एक वर्षदेखि रोकिएको नियुक्ति गर्ने तयारी भएसँगै आकांक्षीहरुको दौडधुप र भनसुन बाक्लिएको छ । उच्च अदालतबाट पाँच जना सर्वोच्चमा तान्ने तयारीमा प्रधानन्यायाधीश छन् । कानुन व्यवसायीबाट दुई जनामात्र ल्याउनुपर्ने अडान प्रधानन्यायाधीश विश्वभरप्रसाद श्रेष्ठको छ । 

यता, कानुन मन्त्री धनराज गुरुङले भने उच्चबाट चार र कानुन व्यवसायीबाट तीन जना ल्याउनुपर्ने अडान राखेका छन् । बाहिरबाट तीन जना ल्याउन सके एक महिलासहित कांग्रेसबाट दुई जनालाई न्यायाधीश बनाउन सकिने उनको मनसाय छ । यही विषयमा प्रधानन्यायाधीश श्रेष्ठ र गुरुङबीच सहमति हुन सकेका छैन । यसको छिनोफानो भने शुक्रबारको न्यायपरिषदमा हुनेछ ।