वार्षिक बजेटकै हाराहारीमा पुग्यो विदेशी मुद्राको सञ्चिति

२४ कात्तिक, काठमाडौं । तीन महिनामा मुलुकको विदेशी मुद्रा सञ्चिति ६.७ प्रतिशतले बढेर १६ खर्ब ४३ अर्ब ९ करोड रूपैयाँ पुगेको छ । नेपाल राष्ट्र बैंकले सार्वजनिक गरेको चालु आर्थिक वर्षको पहिलो तीन महिनाको वित्तीय प्रतिवेदनअनुसार असार मसान्तसम्म १५ खर्ब ३९ अर्ब ३६ करोड रूपैयाँ बराबर रहेको विदेशी मुद्रा सञ्चिति असोज मसान्तसम्म बढेर १६ खर्ब ४३ अर्ब ९ करोड रुपैयाँ पुगेको हो । 

सो अवधिमा अमेरिकी डलरमा भने यस्तो सञ्चिति ५.३ प्रतिशतले बढेर १२ अर्ब ३३ करोड डलर पुगेको छ । कुल विदेशी विनिमय सञ्चितिमा भारतीय मुद्राको अंश २२ प्रतिशत छ । कुल विदेशी विनिमय सञ्चितिमध्ये राष्ट्र बैंकसँग १४ खर्ब ३३ अर्ब ३६ करोड रूपैयाँ बराबर छ भने अरु बैंक तथा वित्तीय संस्थासँग २ खर्ब ९ अर्ब ७३ करोड रुपैयाँ बराबर छ ।

हालको विदेशी मुद्रा सञ्चितिले अहिलेकै आयातलाई आधार मान्दा १२.४ महिनाको वस्तु आयात र १०.३ महिनाको वस्तु तथा सेवा आयात धान्न पर्याप्त रहने राष्ट्र बैंकले जनाएको छ । चालू आर्थिक वर्षको पहिलो त्रैमासमा मुलुकको बाह्य अर्थतन्त्र निकै सकारात्मक रहेको तथ्यांकले देखाएको छ । आर्थिक वर्षको असार मसान्तसम्ममा शोधनान्तर स्थिति ९९ अर्ब ७ करोड रूपैयाँले बचतमा रहेको नेपाल राष्ट्र बैंकले जनाएको हो । 

यस्तै समीक्षा अवधिमा यता मुलुकको चालू खाता समेत ५९ अर्ब ९ करोडले बचतमा रहेको राष्ट्र बैंकले जनाएको छ । जबकि अघिल्लो वर्षको सोही अवधिमा शोधनान्तर स्थिति जम्मा १२ अर्ब ४३ करोडले बचतमा रहँदा उता चालु खाता ३५ अर्ब २४ करोड रुपैयाँले घाटामा रहेको थियो । 

समीक्षा अवधिमा पुँजीगत ट्रान्सफर ५५.६ प्रतिशतले कमी आई रु.१ अर्ब १५ करोड रूपैयाँ कायम भएको छ भने खुद प्रत्यक्ष वैदेशिक लगानी ३ अर्ब ३७ करोड रूपैयाँले धनात्मक रहेको राष्ट्र बैंकले जनाएको छ । अघिल्लो वर्षको सोही अवधिमा पुँजीगत ट्रान्सफर रु.२ अर्ब ५९ करोड रूपैयाँ कायम भएको थियो भने खुद प्रत्यक्ष वैदेशिक लगानी ७ करोड ९६ लाखले धनात्मक रहेको थियो ।