नागरिकता विवादमा परेका उपरथी ताराध्वज पाण्डेले दिए पदबाट राजीनामा

२४ कात्तिक, काठमाडौं । उमेर विवादमा मुछिएका उपरथी ताराध्वज पाण्डेले पदबाट राजीनामा दिएका छन् । भावी प्रधानसेनापतिको रोल क्रममा ल्याउने गरी जंगीअड्डाले अघि सारेका उपरथी पाण्डेले धेरै विवाद आएपछि राजीनामा दिएका छन् । उनले दिएको राजीनामा रक्षा मन्त्रालयमा पठाइएको छ । 

उनी उमेर विवादमा मुछिएका थिए । नेपाली सेनाको जङ्गी अड्डाले भावी प्रधानसेनापतिका रुपमा अघि बढाउँदै रथीमा बढुवा सिफारिस भएका पाण्डेको उमेरबारे विवाद आएको थियो । 

विवादमा तानिएपछि पाण्डेले प्रधानसेनापति प्रभुराम शर्मासमक्ष राजीनामा बुझाएको थिए । यसअघि पाण्डेको उमेरसम्बन्धी विवाद छानबिन गर्न सेनाले रथी सीताराम खड्काको नेतृत्वमा समिति गठन गरेको थियो । पाण्डेका दुई वटा अलग अलग नम्बरका नागरिकता समेत रहेको बताइएको छ । साथै एसएलसीको प्रमाणपत्रमा  केरमेट गरेको पाइएको छ ।

चार दिनअघि मात्रै पाण्डेको उमेर विवादमा छानबिन गर्न अख्तियार दुरुपयोग अनुसन्धान आयोगले निर्देशन दिएको थियो । आयोग स्रोतका अनुसार, सञ्चारमाध्यममा आएका विवरण र आयोगमा समेत उजुरी परेपछि त्यसमाथि छानबिन गर्न रक्षा मन्त्रालयलाई पत्राचार गरिएको थियो ।

रक्षा मन्त्रालयका अनुसार, उपप्रधान एवं रक्षामन्त्री पूर्णबहादुर खड्का पनि विवाद आएपछि यसमा छानबिन गरेर मात्र अघि बढ्नुपर्ने पक्षमा थियो । यसपछि छानबिनका लागि रथी सीताराम खड्काको नेतृत्वमा सेनाको कानुन हेर्ने प्राड विवाकका प्रमुख रत्नप्रकाश थापा र अर्का एक जना सदस्य रहेको समिति बनाइएको थियो ।