रामनगर प्रहरी चौकी तस्करी नियन्त्रणमा सक्रिय, तीन सय केजी अवैध माछा बरामद

२६ कात्तिक, पश्चिम नवलपरासी । जिल्ला प्रहरी कार्यालय पश्चिम नवलपरासी मातहतको रामनगर प्रहरी चौकीको सक्रियतामा तस्करी नियन्त्रण हुन थालेको छ । सो प्रहरी चौकीका इन्चार्ज प्रहरी सहायक निरीक्षक (असई) पुरन केवटको सक्रियतामा तस्कर माथि निगरानी बढाइएको छ र तस्करीका सामानहरू धमाधम पक्राउ पर्न थालेका छन् ।

यही मेसोमा गत कात्तिक २४ गते राती १० बजेको समयमा सुस्ता गाउँपालिका वडा नं. ५ वनकटिया गाउँ हुँदै आएको अवैध माछा प्रहरीले बरामद गरेको छ । विशेष सूचनाका आधारमा सो चौकीबाट खटिएको प्रहरी टोलीले बिना क्वारेन्टाइन जाँचपास अवैध रुपमा भित्र्याएको करिब ३०० किलो माछा पक्राउ गरी भोलिपल्ट नष्ट गरेको छ ।
भारतमा उत्पादित तर नेपालमा प्रतिबन्धित उक्त परिणामको माछा प्रहरीले बरामद गरी नष्ट गरेको हो । तस्करहरूले सीमावर्ती विभिन्न नाकाहरू प्रयोग गरी पश्चिम नवलपरासीका सीमावर्ती नाकाबाट माछा लगायतका अन्य सामानहरू ल्याउने प्रयत्न गर्दा प्रहरीको सक्रियताले धमाधम पक्राउ पर्न थालेका छन् ।

खास गरी रामनगर प्रहरी चौकीका इन्चार्ज असई केवटको तस्करी नियन्त्रण गर्ने अठोटले केही तस्करहरू भने तिल्मिलाउन थालेका छन् । ती तस्कर र तिनका मतियार केही भ्रष्ट प्रहरीहरु भने उनै असई केवट विरुद्ध अन्टसन्ट लेखाएर बदनाम गराउने षडयन्त्रमा लागेको जिल्ला प्रहरी कार्यालय पश्चिम नवलपरासीका एक अधिकृतले बताए । 

तर जिल्ला प्रहरी प्रमुख प्रहरी उपरीक्षक काजी कुमार आचार्य तथा इलाका प्रहरी कार्यालय बेलाटारीको दह्रो साथ र सहयोग पाएपछि असई केवट थप सक्रियताका साथ तस्करी नियन्त्रण गर्न प्रतिबद्ध भई लागिपरेका छन् । प्रहरी भित्र इमानदार प्रहरीको छवि बनाएका असई केवट अपराध अनुसन्धानमा पनि पोख्त मानिन्छन् ।