सांसद विकास कोषको रकम भूकम्प प्रभावित क्षेत्रमा खर्च गरिने, १० अर्बको राहत कोष बनाउने निर्णय

२७ कात्तिक, काठमाडौं । सरकारले सांसद विकास कोषको रकम जाजरकोट भूकम्पपीडितका लागि खर्चने भएको छ । भूकम्प पीडितको राहत, पुनःस्थापना र अस्थायी आवास निर्माणका लागि सो रकम खर्चने भएको हो । 

सोमबार बिहान बसेको मन्त्रिपरिषद बैठकले सांसद विकास कोषमा रहेको झण्डै ८ अर्ब र दातृ निकायहरूबाट आएको सहयोग थपेर १० अर्बको कोष निर्माण गर्ने र त्यसबाट खर्च गर्ने निर्णय गरेको हो । 
 
सांसद विकास कोषको रकम खर्च नगर्न सर्वोच्चमा मुद्दा परेको थियो । योसँगै सरकारलाई उक्त कोषको रकम भुकम्प पीडितका लागि खर्च गर्न बाटो खुलेको छ । साथै बैठकले भुकम्प पीडितको सहयोगका लागि अन्तराष्ट्रिय दातृ निकायलाई सहयोगका लागि आव्हान गर्ने भएको छ । 

गत कात्तिक १७ गते जाजरकोटको रामीडाँडा केन्द्रबिन्दु भएर गएको भुकम्पले जाजरकोट र रुकुम पश्चिममा बढी क्षति भएको थियो । सांसदलाई रकम दिँदा अदालतको अपमान हुने भएकाले सो रकम भूकम्प पीडितको पुनःस्थापनामा खर्चने निर्णय सरकारले गरेको मन्त्री शरदसिंह भण्डारीले जानकारी दिए ।