माइतीघरमा टिकटक फुकुवा गर्न माग, ‘न्याय देउ अदालत’

२ मंसिर, काठमाडौं । टिकटक बन्द गर्ने सरकारी निर्णयको विरुद्धमा काठमाडौंको माइतीघरमा प्रदर्शन भएको छ । सरकारले सामाजिक सञ्जाल टिकटकको प्रयोगमा लगाएको प्रतिबन्धको विरोधमा माइतीघर मण्डलामा विरोध प्रदर्शन गरिएको हो । 

शनिबार दिउँसो टिकटकका प्रयोगकर्ताहरूले सरकारले लगाएको प्रतिबन्ध फुकुवा गर्न माग गर्दै प्रदर्शन गरेका हुन् । उनीहरूले अभिव्यक्ति स्वतन्त्रताको सम्मान गर्न आग्रह गरेका छन् । प्रधानमन्त्रीलाई तानाशाह नबन्न र सर्वोच्च अदालतलाई न्याय दिन उनीहरुको माग छ । 

सरकारको यो निर्णयविरुद्ध सर्वोच्चमा १० वटा रिट दर्ता भइसकेको छ । रिट निवेदनहरूमाथि मङ्सिर ४ गते प्रारम्भिक सुनुवाइ हुने भएको छ । शुक्रबार पेस भएका रिट निवेदनहरू दर्ता गर्दै सर्वोच्च अदालतले मङ्सिर ४ गतेका लागि पहिलो पेशी तोकेको हो ।