कुमारी बैंकको नयाँ सीईओमा चार्टर्ड एकाउन्टेन्ट खनाल नियूक्त, अर्यालले दिए राजीनामा

२ मंसिर, काठमाडौं । कुमारी बैंकको नयाँ प्रमुख कार्यकारी अधिकृत (सीईओ)मा चार्टर्ड एकाउन्टेन्ट एवं युवा बैंकर रामचन्द्र खनाल नियूक्त भएका छन् । शुक्रबार बसेको सञ्चालक समितिको वैठकले खनाललाई आगामी चार वर्षका लागि सीईओ नियूक्त गरेको हो । उनी यसअघि बैंक कै वरिष्ठ सीईओका रुपमा कार्यरत थिए । 

एनसीसी र कुमारी बैंकलाई सफल मर्जर गराएका रमेशकुमार अर्यालले कुमारी बैंकको प्रमुख कार्यकारी अधिकृतबाट स्वास्थ्यको कारण देखाउँदै राजीनामा दिएका थिए । सीईओ अर्यालले तिहार बिदा अघि दिएको राजीनामा शुक्रबार बसेको बैंक सञ्चालक समितिको बैठकले स्वीकृत गरेको हो । 

कुमारी बैंकले मर्जरपछिको बैंकमा सञ्चालक समितिको अध्यक्ष पाएपछि सीईओ एनसीसी बैंकका तत्कालीन सीईओ समेत रहेका अर्याललाई दिइएको थियो ।  

यसअघि कुमारी बैंकका तत्कालीन सीईओ अनुजमणि तिम्सिनाले राजीनामा दिएपछि युवा बैंकर खनालले कामु सीईओको जिम्मेवारी पाएका थिए । 

सीईओमा नियुक्त खनाल नेपालका वाणिज्य बैंकहरुमा करिअरको छोटो अवधिमा उपल्लो स्तरमा पुग्ने सीमित बैंकरमध्ये गनिन्छन् । चार्टर्ड एकाउण्टेन्ट खनालले १४ वर्षअघि सानिमा बैंकको सिनियर अफिसरबाट करिअर सुरु गरेका थिए । 

त्यसपछि सिद्धार्थ बैंकमा ८ वर्ष काम गरेका खनाल कुमारी बैंकमा सहायक महाप्रबन्धकका रुपमा प्रवेश गरेका थिए । नेपालबहससँग कुरा गर्दै खनालले कुमारी बैंकलाई टप फाइभ वाणिज्य बैंकका रुपमा उभ्याउने प्रतिबद्धता व्यक्त गरेका छन् ।