हमासले पहिलो चरणमा रिहा गर्ने ५० जनाभित्र नेपालका वीपिन जोशीको सम्भावना कति ?

६ मंसिर, काठमाडौं । इजरायलले आक्रमण रोक्ने र प्यालेस्टिनी लडाकु समूह हमासले पहिलो चरणमा ५० जनालाई रिहा गर्ने सहमति भएको खबर बाहिरिएपछि नेपाल सरकारले पनि हराइरहेका एक नेपाली विपिन जोशीका बारे थप चासो बढाएको छ । 

इजरायलस्थित नेपाली दूतावासले हमासले रिहा गर्ने ५० जनाभित्र विपिन पनि पर्न सक्ने गरि प्रयास गरिरहेको जनाएको छ । परराष्ट्र मन्त्रालयले हमासले पहिलो चरणमा ५० जना रिहा गर्ने सहमति भएपछि दूतावासलाई त्यहाँको अवस्था अनुसार पहल गर्न भनेको जनाएको छ । 

बीबीसीमा अनुसार इजरायलको प्रधानमन्त्री कार्यालयले हमासले ५० जना पहिलो चरणमा रिहा गर्न सहमति भएको छ । तर, नेपाल विपिन जोशीको अवस्था अझै अज्ञात नै छ । उनलाई हमासले एक अस्पतालमा बन्दक बनाएर राखेको भीडीयो सार्वजनिक गरेपछि उनी सकुशल रहेको बताइएको थियो ।  

प्रधानमन्त्री कार्यालयले भनेको छ, ‘इजरायल सरकार सबै बन्धकहरूलाई घर फर्काउनका लागि प्रतिबद्ध छ । यो उद्देश्य पूरा गर्नका लागि पहिलो चरणको रुपरेखालाई आज सरकारले मन्जुरी दिएको छ । यस अनुसार ५० बन्धक (महिला र बच्चासमेत)चार दिनभित्र रिहा हुनेछन् । यस क्रममा लडाइ रोकिने छ ।’

बन्धक बनाइएकाहरुलाई रिहा गरिसकेपछि भने हमासलाई सफाया गर्ने सैन्य अभियान फेरि सुरु हुने इजरायलले जनाएको छ । हमासले मानवीय सहायताका लागि युद्ध विराममा सहमति भएको जनाएको छ । यस सहमतिका लागि मध्यस्थता गरेको भन्दै हमासले कतार र इजिप्टप्रति आभार व्यक्त गरेको छ ।

सोमबारदेखि नै इजरायल सरकार र हमास युद्धविरामका लागि सहमति नजिक रहेका समाचारहरू सार्वजनिक भएका थिए । नेपाली युवक विपिन जोशी पनि हमासको नियन्त्रणमा रहेको इजरायल सरकारले जनाएको छ । तर उनको अवस्था रिहाइबारे केही प्रष्ट भएको छैन । 

युद्ध विराम र बन्दी रिहाइ सम्बन्धी प्रस्ताव इजरायलको मन्त्रिपरिषदबाट पारित भएपछि हमासको कब्जामा रहेका करिब दुई सय जनाको रिहाइ प्रक्रिया सुरु हुने बताइएको छ । यसै अन्तर्गत पहिलो चरणमा हमासको नियन्त्रणमा रहेका ५० जना रिहा हुनेछन् ।