युवा संघका कार्यकर्ता बताउनेबाट पार्टी प्यालेसमा सुतिरहेका प्रसाईंका समर्थकमाथि अमानवीय व्यवहार

६ मंसिर, काठमाडौं । मंसिर ७ गते काठमाडौंमा हुने आन्दोलनमा सहभागी हुन विभिन्न जिल्लाबाट काठमाडौं आएका दुर्गा प्रसाईंका समर्थकलाई राति पार्टी प्यालेसमा सुतेको अवस्थामा नेकपा एमाले निकट युवा संघका कार्यकर्ताले लखेटेको भीडीयो सार्वजनिक भएको छ । यो भीडीयो सार्वजनिक भए लगत्तै नेकपा एमालेको चर्को आलोचना सुरु भएको छ । 

यता, एमाले निकट युवा संघ नेपालले भने युवा संघ कार्यकर्ताबाट यस्तो अमानवीय हर्कत हुन नसक्ने भन्दै आफूहरूलाई बदनाम गराउन कसैबाट यस्तो नियोजित काम भएको बताएको छ । उसले यस प्रकरण छानविन गर्ने जनाएको छ । 

मंगलबार इटहरीबाट आएका प्रसाईंका समर्थक बसेको लोकन्थलीस्थित पार्टी प्यालेसबाट मध्यरातमा एमाले समर्थक युवा संघका कार्यकर्ताले उनीहरूलाई निकालेको भिडियो सामाजिक सञ्जालमा भाइरल भएको छ ।

भाइरल भिडियोलाई युवा संघले अस्वीकार गरेको छ भने आफूहरूको बदनाम गराउनका लागि गरिएको षडयन्त्र भनेको छ । प्रसाईं समर्थकले भने युवा संघका कार्यकर्ताले नै यस्तो हर्कत गरेको आरोप लगाएका छन् ।
 
राति साढे ११ बजेतिर पार्टी प्यालेस पुगेको समूहले त्यहाँ रहेका पाहुनालाई बाहिर निकालेको सञ्चालक तेजबहादुर कुँवरले जानकारी दिए । सार्वजनिक भएको भिडियोमा सुतिरहेका महिलालाई कपडा लगाउन पनि नदिइ हतार हतारमा निकालिएको छ ।

भीडीयोमा हामी जान्छौँ तर लुगा लगाउन त दिनु, सुतिरहेका महिलाले अनुरोध गर्दै भनेकी छन्, हामी पनि तपाईंहरुकै चेली हौँ । दुर्गा प्रसाईं भन्दै उफ्रिँदै ? उनीहरूलाई बस्न नदिने चेतावनी उक्त भिडियोमा दिइएको छ । पार्टी प्यालेस सञ्चालक तेजबहादुर कुँवरले राति ११ बजे आफूलाई फोन गरेर यहाँ प्रसाईंका समर्थक नराख्न दबाब दिइएको बताए ।

उनका अनुसार अब संघमा छलफल गरेर आफूहरू अघि बढ्ने तयारी भएको छ । प्रसाईंका प्रेस सल्लाहकार सज्जनराज पोखरेलले राति युवा संघका कार्यकर्ताले आफूहरूका समर्थकलाई निकालेपछि गौशालास्थित धर्मशालामा लगेर राखेको बताए । यता, युवा संघले भने यस्तो हर्कत युवा संघका कार्यकर्ताले गर्न नसक्ने दावी गरेको छ । 

युवा संघका प्रवक्ता निरोज पौड्यालले बुधबार दिउँसो गर्ने कोणसभा र बिहीबार तीनकुनेमा गर्ने प्रदर्शनको पूर्व तयारीका लागि राति अबेरसम्म केन्द्रीय कार्यालयमा बसेर योजना बनाएको तर राति महिलाहरूलाई लखेट्न नगएको बताए । आफूहरूलाई बदनाम गराउन र सात गतेको कार्यक्रमलाई असफल बनाउन विरोधी तत्व लागेको उनले जिकिर गरे । यद्यपि संगठनभित्र यसबारे छानबिन गर्ने र कसैको संलग्नता देखिए कारबाही गर्ने प्रतिबद्धता पनि उनले जनाए ।