खरिद गर्ने भनिएका तीन वटा जहाजको वित्तीय स्रोत र प्रक्रियामाथि प्रश्न उठेपछि निगममा हलचल

१० मंसिर, काठमाडौं । नेपाल वायुसेवा निगमले नयाँ खरिद गर्न लागिएका जहाजसँग जोडेर समाचारहरू आउन थालेपछि जहाज खरिद र संस्थाको पुनः संरचना एक अर्कालाई रोकेर गर्ने विषय नभएकाे प्रतिक्रिया दिएको छ । जहाज खरिदमा भइरहेका चलखेलबारे नेपालबहसले शुक्रबार समाचार प्रकाशित गरेको थियो ।  

निगमले दुर्गम भेगमा उडाउने गरी ३ वटा ट्वीनअटर जहाज किन्दैछ । यसको आर्थिक स्रोत आफ्नै स्रोतबाट जोहो गरिने निगमको दाबी छ । ‘६ महिनाको अन्तरमा यी जहाज ल्याइने र सबै रकम एकमुष्ट तिर्नु नपर्ने भएकाले यसको व्यवस्थापन गर्न निगम सक्षम छ, जारी विज्ञप्तिमा भनिएको छ ।

निगमले पारदर्शी ढंगले जहाज खरिद प्रक्रिया अगाडि बढाएको र यसका लागि तालुक मन्त्रालयबाट अनुमति लिएको दावी गरेको छ । यसअघि निगमको सुधारका लागि बनेका समितिहरुको प्रतिवेदनले जहाज अपरिहार्य रहेको प्रतिवेदन दिएको भन्दै निगमको गुणात्मक सुधारका लागि यी जहाज आवश्यक रहेको दावी गरेको छ । 

संस्थाको पुनर्संरचनाबारे प्रश्न उठिरहेका बेला आन्तरिक उडानका लागि जहाज खरिद प्रक्रिया अगाडि बढाएको निगमले यी दुई विषय एक अर्कालाई रोकेर गर्ने विषय नभएको बताएको हो । निगमको दैनिक व्यवसाय सञ्चालन गर्न र दुर्गम भेगका जनतालाई सेवा दिन जहाज आवश्यक रहेको भन्दै पुनः संरचनाको काम क्रमशः हुँदै जाने प्रतिक्रिया दिएको हो ।