नेपाललाई औपचारिक जानकारी नदिई उच्चस्तरीय अमेरिकन टोली काठमाडौंमा

१३ मंसिर, काठमाडौं ।  नेपाल सरकारलाई औपचारिक जानकारी नगराई एक अमेरिकी उच्च स्तरको टोली काठमाडौं आएको खुलेको छ । उक्त टोली गए राती १ बजे काठमाडौं एयरपोर्टमा ओर्लिएको बताइएको छ । टोली किन नेपाल आएको हो भन्ने खुलेको छैन ।  

उक्त टोली एमसीसी कम्प्याक्ट अपरेसन विभागको ट्रान्सपोर्टेसन तथा भर्टिकल स्ट्रक्चर समूहका सिनियर डाइरेक्टर योहानेस अबेबे नेतृत्वको भएको र टोली कतार एअरवेजको उडान नम्बर क्युआर ६४४ मा दोहाबाट राति साढे १ बजे काठमाडौं आइपुगेको स्रोतको दाबी रहेपनि एमसीए नेपालले भने यसबारे जानकारी नभएको बताएको छ । 

एमसीए नेपालले एमसीसी  अन्तर्गतको कुनैपनि अमेरिकन टोली नेपाल आउने कुरा नभएको जनाएको छ । यसबारे एमसीए नेपालका प्रेस एडभाइजर पुस्कर माथेमाले उनीहरू नेपाल आएकोबारे एमसीए नेपाललाई जानकारी नभएको बताए । उनले नेपालस्थित अमेरिकी दूतावासलाई जानकारी गराएर उनीहरू नेपाल आएको हुनसक्ने बताए । 

यता, अमेरिकी दूतावासले पनि उनीहरूको भ्रमणबारे औपचारिक जानकारी नभएको बताएको छ । उनीहरू एमसीसीको नभएर अरू कुनै कामले नेपाल आएको हुनसक्ने दूतावासको भनाइ छ ।  अबेबेसँग अन्य दुई जना पनि नेपाल आएको र यसबारे नेपाल सरकारलाई औपचारिक जानकारी नगराएको स्रोतको दावी छ ।