न्याय परिषदले सर्वोच्चमा न्यायाधीश सिफारिस गरेका ६ जनाको सुनुवाइ मंसिर २७ देखि २९ सम्म

२१ मंसिर, काठमाडौं । न्यायपरिषदले सर्वोच्च अदालतको न्यायाधीशमा नाम सिफारिस गरेकाहरुको सुनुवाइ मंसिर २७ देखि हुने भएको छ । बिहीबार बसेको संसदीय सुनुवाइ समितिको बैठकले सर्वोच्च अदालतको न्यायाधीशमा सिफारिस व्यक्तिहरुसँग मंसिर २७, २८ र २९ गते सुनुवाइ गर्ने निर्णय गरेको हो । 

न्यायपरिषदको ५ मंसिरमा बसेको बैठकले सर्वोच्च अदालतको न्यायाधीशमा सारंगा सुवेदी, अब्दुल अजिज मुसलमान, महेश शर्मा पौड्याल, टेकप्रसाद ढुंगाना, सुनिल पोखरेल र बालकृष्ण ढकालको नाम सिफारिस गरेको थियो । समितिले यसअघि ९ मंसिरमा सर्वोच्चको न्यायाधीशमा सिफारिस व्यक्तिउपर उजुरी आह्वान गरेको थियो । हालसम्म समितिमा ९ वटा उजुरी परेको छ ।

समितिले उजुरीकर्तासँग मंसिर २४ गते छलफल गर्ने र त्यसको ३ दिनपछि न्यायाधीशमा सिफारिस व्यक्तिहरुको सुनुवाइ गर्ने तय गरेको छ । उनीहरुमाथि परेका उजुरी केलाएर सुनुवाइ सुरु गर्ने समितिले जनाएको छ ।