नियुक्ति प्रक्रिया विवादमा रहेकै बेला सभामुख घिमिरेद्वारा पाण्डेलाई कार्यवाहक महासचिवमा नियुक्त

२७ मंसिर, काठमाडौं । राष्ट्रपति कार्यालयले प्रक्रिया नपुगेको भन्दै रोकेर राखेका पदमप्रसाद पाण्डेलाई सभामुख देवराज घिमिरेले संघीय संसदको कार्यवाहक महासचिव नियुक्त गरेका छन् । सभामुख घिमिरेलाई पाण्डेलाई कार्यवाहक महासचिव नियुक्ति गरेको संघीय संसदका प्रवक्ता टेकराज गिरीले जानकारी दिएका छन् ।

यतिबेला संघीय संसद्को महासचिवबाट भरतराज गौतमले दिएको राजीनामा र सो पदमा प्रतिनिधिसभा सचिव पदमप्रसाद पाण्डेयको नियुक्ति सिफारिस विवादमा परेको छ । महासचिवमा पाण्डेयलाई सभामुख देवराज घिमिरे र राष्ट्रियसभा अध्यक्ष गणेशप्रसाद तिमिल्सिनाले प्रक्रिया नपुर्याई सिफारिस गरेको भन्दै राष्ट्रपति कार्यालयले अध्ययनका क्रममा राखिदिएको छ । 

सभामुख र राष्ट्रियसभाका अध्यक्षको सिफारिसमा राष्ट्रपतिले संसदको महासचिव नियुक्त गर्ने कानुनी व्यवस्था छ । राष्ट्रपतिबाट महासचिव नियुक्तिमा ढिलाइ भएपछि सभामुखले कार्यवाहक तोकेका हुन् । कार्यवाहक महासचिव तोक्ने अधिकार भने सभामुखलाई रहेको छ ।

प्रशासनिक नेतृत्व नहुँदा संघीय संसद दिवसका सन्दर्भमा गर्नुपर्ने कतिपय काममा प्रभाव परेको, लोक सेवाबाट सिफारिस भएर आएका कर्मचारीको नियुक्तिलगायतमा प्रभाव परेका कारण सभामुखले कार्यवाहक तोकेको उनको सचिवालयले स्पष्ट पारेको छ । सभामुखले महासचिव नियुक्तिमा भएका ढिलाइ वा चासोबारे राष्ट्रपतिसँग संवाद गर्न चाहेको तर सम्पर्क नभएको पनि उनले सचिवालयले जनाएको छ ।