नक्कली भूटानी शरणार्थीबारे दोस्रो चरणको अनुसन्धान अन्यौलमा

२८ मंसिर, काठमाडौं ।  नेपाली नागरिकलाई भुटानी शरणार्थी बनाएर अमेरिका पठाउने भन्दै भएको संगठित ठगी घटनामा उच्च अदालतमा बहस सकिएर फैसला आइसक्दा पनि दोस्रो चरणको अनुसन्धानबारे प्रहरीमा अन्यौल रहेको छ । काठमाडौं प्रहरी परिसरले यसलाइ केही समय अघि अनुसन्धान गुपचुप अघि बढाएको भएपनि अनुसन्धान सकिएको वा कायम रहेको भन्नेबारेमा अन्यौल रहेको हो ।

 पहिलो चरणको अनुसन्धान सकिएपछि परेका जाहेरीलाई आधार बनाएर जिल्ला प्रहरी परिसर, काठमाडौंले अनुसन्धान थालेको थियो । नक्कली भुटानी शरणार्थी प्रकरणको अनुसन्धानमा प्रहरी अधिकारी फेरिँदैमा कुनै असर पर्दैन । दोस्रो चरणमा पनि सुक्ष्म अनुसन्धान नै भइरहेको भन्ने प्रहरीको भनाई रहेपनि अहिलेसँम्म कोही पनि व्यक्ति पक्राउ नपरेकाले परिसरमै थन्किएको आशंका रहेको छ ।

उच्च अदालत पाटनमा थुुनछेकको बहस शुरु हुनअघि परिसरले पुर्पक्षका लागि थुनामा रहेका बिचौलियाहरुलाई झिकाएर बयान गराएको थियो । तर उनीहरूले के कस्तो बयान दिए भन्ने बारेमा केही उल्लेख छैन । काठमाडौं परिसरले यसै साता सानु भण्डारी, केशव दुलाल, सन्देश शर्मालगायतको बयान लिएको थियो । साउनको अन्तिम साता १८ जना पीडितले दिएको जाहेरीका आधारमा प्रहरीले दोस्रो चरणको अनुसन्धान अघि बढाएर उनीहरूको बयान लिएको स्रोतको दावी छ । किटानी जाहेरीमा नाम उल्लेख गरिएका बिचौलियाले नै सर्वसाधारणसँग पैसा उठाएर गृह मन्त्रालयका अधिकारीलगायत उच्चपदस्थलाई आर्थिक प्रभावमा पारी आफूअनुकूल काम गराउने प्रयास गरेका थिए ।

पहिलो चरणको अनुसन्धानमा उनीहरूले यो कुरा बयानमा मात्र बताएनन्, त्यसको प्रमाणसमेत दिएका थिए । तर, यसपटक उनीहरूको बयान फेरिएको स्रोतले जनाएको छ  । यसपटकको बयानमा उनीहरूले उच्चपदस्थहरूको नाम लिएका छैनन । साथै, बयान पनि इन्कारी दिएका छन । जसकारण अनुसन्धान प्रभावित भएको हुनसक्ने अनुमान गरिएको छ । 

यसअघि उनीहरूकै बयानका आधारमा कांग्रेस नेता बालकृष्ण खाण, एमाले नेता टोपबहादुर रायमाझीलगायतका उच्चपदस्थ पक्राउ परेका थिए । हाल उनीहरू पनि पुर्पक्षका लागि जेलमा छन । बालकृष्ण खाँणको हकमा उच्च अदालत पाटनमा आज पनि सुनुवाइ रहेको छ , उच्च अदालत पाटनबाट उनको  फैसला आजै आउनसक्ने संभावना रहेको छ । दोस्रो चरणमा उच्चपदस्थहरूमाथिको अनुसन्धानमा प्रहरीले पनि चासो राखेको छैन । यसअघि संगठित अपराध, राज्यविरुद्धको कसुर, ठगी र लिखत किर्ते मुद्दा दायर भएको थियो ।

 अहिले सामान्य ठगी मात्र चलाउनुपर्ने दबाब प्रहरीमाथि परेको छ । दोस्रो चरणको अनुसन्धानबारे जिल्ला प्रहरी परिसर काठमाडौंका अधिकारी औपचारिक कसैले केही पनि बताएका छैनन ।