एनसेलले प्राधिकरणलाई बुझायो शेयर पर्चेज एग्रिमेन्ट

४ मंसिर, काठमाडौं । एनसेलको आजियाटा लिमिटेडले एनसेलमा रहेको ८० प्रतिशत शेयर बेलायतको स्पेक्ट्रलाइट यूके लिमिटेडलाई बिक्री गर्न गरेको शेयर खरिद सम्झौताको दस्तावेज नेपाल दूरसञ्चार प्राधिकरणमा बुझाएको छ ।

एनसेलले बुधबार खरिद बिक्रीसम्बन्धी कागजात प्राधिकरणलाई बुझाएको प्रवक्ता सन्तोष पौडेलले जानकारी दिए । कागजात प्राप्त भएको छ, त्यसमा के छ भन्ने बारे अब प्राधिकरणले अध्ययन गर्छ,’ उनले भने । गएको २९ सेप्टेम्बर २०२० (१२ असोज २०८०) मा आजियाटाको बोर्डले एनसेलबाट बाहिरिने निर्णय गरेको थियो । 

त्यसबारे कम्पनीले कुनै पनि जानकारी दिएको थिएन । १३ मंसिरमा आजियाटाले तेस्रो त्रैमासको वित्तीय विवरण सार्वजनिक गर्दा उसले एनसेलको शेयर बिक्रीमा राखेको जनाएको थियो । त्यसको दुई दिनपछि १५ मंसिरमै आजियाटा र बेलायतमा दर्ता भएको सतिशलाल आचार्य सञ्चालक रहेको स्पेक्ट्रलाइट यूकेबीच सेयर खरिद बिक्री भएको जानकारी आजियाटाले गराएको थियो ।

एनसेलले शेयर पर्चेज एग्रिमेन्ट (एसपीए)बारे विवरण उपलब्ध गराएको प्राधिकरणका निर्देशक एवं प्रवक्ता पौडेलले बताए । एनसेलको मुख्य कम्पनी आजियाटाले एनसेलको ८० प्रतिशत शेयर स्वामित्व बिक्री गर्दै नेपालबाट बाहिरिने घोषणा गरेको थियो ।  खरिदबिक्रीको मूल्य र प्रक्रिया अस्वाभाविक देखिएपछि यो विषय विवादित बनेको छ ।

एनसेलको ८० प्रतिशत शेयर रेनोल्ड होल्डिङ्को नाममा छ भने २० प्रतिशत सुनिभेरा क्यापिटल भेन्चरको नाममा छ ।  मलेसियन कम्पनी आजियाटाको बेलायती कम्पनी आजियाटा युके लिमिटेड अन्तर्गत रेनोल्ड होल्डिङ्स रहेको थियो । 

आजियाटा युके लिमिटेडले नेपाली मूलका व्यवसायी सतिशलाल आचार्यको बेलायती कम्पनी स्पेक्ट्रलाइट युके लिमिटेडलाई रेनोल्ड होल्डिङ्स बिक्री गरेको हो ।  यो खरिद बिक्री प्रकरणमा अस्वाभाविक मूल्य र प्रक्रियाले विवाद चुलिएपछि अहिले सरकारको उच्चस्तरीय समितिले पनि छानबिन गरिरहेको छ ।