१८ जनाविरुद्धको फाइल बोकेर सर्वोच्च पुग्यो अख्तियार

६ पुस, काठमाडौं । चुनढुंगा उत्खनन सम्बन्धीको भ्रष्टाचार मुद्दामा सजाय हुनुपर्ने आरोपीलाई सफाई दिएको भन्दै अख्तियार दुरुपयोग अनुसन्धान आयोगले सर्वोच्च अदालतमा पुनरावेदन पत्र दर्ता गराएको छ । शुक्रबार १८ जनाविरुद्ध अख्तियारले सर्वोच्चमा दिएको निवेदन दर्ता भएको सर्वोच्च प्रशासनले जनाएको छ ।  

तोकिएभन्दा बढी चुनढुंगा निकालेका सिमेन्ट उद्योगहरूसँग राजस्व असुल नगरेर भ्रष्टाचार गरेको आरोप लागेका १८ जनालाई विशेष अदालतले गत चैतमा सफाइ दिएको थियो । यसको विरुद्धमा अख्तियार सर्वोच्च गएको हो । राज्यकोषमा ठूलो रकम नोक्सानी पुर्याउँदा पनि विशेष अदालतले सफाई दिएर त्रुटीपूर्ण काम गरेको भन्दै अख्तियारले सर्वोच्च अदालतमा पुनरावेदन दिएको हो । 

विशेष अदालतले गत चैतमा १८ जनाविरुद्धको आरोप पुष्टि नहुने भन्दै सबैलाई सफाइ दिएको थियो । १२ माघ २०७८ मा उनीहरू विरुद्ध एक अर्ब २६ करोड १९ लाख रूपैयाँ राज्यकोषमा नोक्सान पारेको दाबीसहित भ्रष्टाचार मुद्दा दायर भएको थियो ।

विशेष अदालतको फैसलाबाट सर्वोत्तम सिमेन्टका सञ्चालक विष्णुप्रसाद न्यौपाने, सिद्धार्थ मिनरल्स प्रालिका पशुपति मुरारका, मारुती सिमेन्ट लिमिटेडका शरद गोयल, अन्नपूर्ण क्वायरिजका ऋषि अग्रवाल, उदयपुर मिनरल्सका प्रबलजंग पाण्डे, युनाइटेड सिमेन्टका नरेश दुगड, सोनापुर मिनरल्सका निपेश तायल, कञ्चभन क्वेरिजका भीमबहादुर थापा क्षेत्री र डोलोमाइट चुनढुंगा उद्योगका मानबहादुर श्रेष्ठलाई पनि विशेष अदालतले सफाइ दिएको थियो ।

यस्तै खानी तथा भूगर्भ विभागका महानिर्देशक रामप्रसाद घिमिरे, माइनिङ इञ्जिनियर जयराम घिमिरे, कानुन उपसचिव सपना अधिकारी, उपन्यायाधिवक्ता चन्द्रकुमार पोखरेल, इञ्जिनियरहरू प्रशान्त बोहरा, धर्मराज खड्का, लेखा अधिकृत श्रीभद्र गौतम, रिसर्च अधिकृत बसन्त अधिकारी, भूगर्भविद डा. सौनक भण्डारीले सफाइ पाएका थिए ।