कांग्रेस केन्द्रीय समितिको बैठकमा सरकार र पार्टीको वार्षिक समिक्षा हुने

१२ पुस, काठमाडौं । नेपाली कांग्रेसले सरकार गठन भएको एक वर्ष र पार्टीले गरेको वार्षिक कार्यक्रमको समीक्षा गर्न आजदेखि केन्द्रीय कार्यसमिति बैठक बोलाएको छ । बैठक दिउँसो एक बजेदेखि पार्टी केन्द्रीय कार्यालय सानेपामा सुरु हुनेछ । 

गएको पुस १० गठनभएको सरकारले एक वर्ष पुरा गरेको छ । कांग्रेस सरकारमा सहभागी छ । कांग्रेसका मन्त्रीहरुले अपेक्षा अनुसार काम गर्न नसकेको गुनासो आइरहेको छ भने कांग्रेसबाट मन्त्री भएकाहरू पनि परिवर्तन हुने हल्ला छ ।  

पार्टीबाट सरकारमा सहभागी भएका मन्त्रीहरूको कार्यसम्पादनको समीक्षा हुने कांग्रेस नेताहरूले बताएका छन् । प्रधानमन्त्री पुष्पकमल दाहाल प्रचण्डको कार्यशैलीप्रति कांग्रेस नेताहरु असन्तुष्टि जनाउँदै आएका छन् ।  खासगरी कांग्रेस नेता डा. शेखर कोइरालाले सरकारको नेतृत्व परिवर्तन गर्नुपर्ने आवाज उठाइरहेका छन् ।  

आजको बैठकमा पार्टीबाट सरकारमा गएका मन्त्रीले आफूले गरेका कामको जानकारी गराउने र त्यसमाथि छलफल हुनेछ । यसका साथै राष्ट्रियसभा सदस्यको निर्वाचनलगायतका विषयमा पनि छलफल हुने कांग्रेसले जनाएको छ । राष्ट्रियसभा सदस्यको निर्वाचन ११ माघका लागि तय भएको छ ।