प्रधानमन्त्री कार्यालयको ६८ दरबन्दी कटौती, सीटीईभीटीको सदस्य सचिवमा भट्टराईलाई नियुक्त

१२ पुस, काठमाडौं । सरकारले प्रधानमन्त्री कार्यालयका ६८ वटा दरबन्दी कटौती गर्ने निर्णय गरेको छ । बिहीबार बसेको मन्त्रिपरिषद बैठकको निर्णय सुनाउँदै सञ्चार तथा सूचना प्रविधि मन्त्री रेखा शर्माले त्यस्तो निर्णय भएको जानकारी दिइन् । 

प्रधानमन्त्री तथा मन्त्रिपरिषदको कार्यालयको प्रस्तावमा कार्यालयको पुनर्संरचनासहितको संगठन तथा सर्वेक्षण स्वीकृत गर्ने भन्ने निर्णय भएको छ । यस अनुसार प्रधानमन्त्री कार्यालयको हालको दरबन्दीमा ६८ वटा दरबन्दी कम हुने भन्ने छ, उनले भनिन् । 

शर्माले प्रधानमन्त्री कार्यालयको ६८ दरबन्दी कटौती भएको बताइन् । प्रधानमन्त्रीले एक वर्ष पुगेको अवसरमा प्रधानमन्त्री कार्यालयको पुनर्संरचनाबाट सुरु गर्ने भनेको र सोही अनुसार भएको उनले बताइन । 
 
सरकारले प्राविधिक शिक्षा तथा व्यावसायिक तालिम परिषद् (सिटिइभिटी)को सदस्य सचिवमा महेश भट्टराईलाई नियुक्त गरेको छ । मन्त्रिपरिषद बैठकले भट्टराई सदस्य सचिवमा नियुक्त गर्ने निर्णय गरेको हो । यस्तै सरकारले गहुँको न्यूनतम समर्थन मूल्य पनि तोकेको छ । 

मन्त्रिपरिषद बैठकले यो वर्षका लागि गहुँको न्यूनतम् समर्थन मूल्य प्रति क्विन्टल ३६ सय ५० रुपैयाँ निर्धारण गरेको सरकारका प्रवक्ता तथा सूचना मन्त्री रेखा शर्माले जानकारी दिइन् ।