बाँकेको नौबस्तामा रहेको बाल सुधार गृहमा झडप, ६ जना घाइते

१५ पुस, काठमाडौं । बाँकेको नौबस्तामा रहेको जयेन्तु बाल सुधार गृहमा झडप हुँदा ६ जना घाइते भएका छन्। भक्तपुर र वीरगन्जबाट आएको समूह र जयेन्तु बाल सुधार गृहको टोलीबिच झडप हुँदा ६ जना घाइते भएको बाँके प्रहरीले जनाएको छ । 

बालसुधार गृहका बालबन्दीबीच झडप हुँदा ६ जना घाइते भएको प्रमुख जिल्ला अधिकारी श्रवणकुमार पोखरलले बताए। जयेन्तु बाल सुधार गृहबाट आएको समूहमा केही भक्तपुर र वीरगन्जबाट आएकाहरु पनि छन्।

शुक्रबार साँझ झडप भए पनि शनिबार र आइतबार झडप भएको छैन। तर अहिले पनि अवस्था भने तनावग्रस्त नै छ। यहाँ सुरक्षाकर्मीले स्थिति नियन्त्रणमा लिन खोजिरहेका छन्। बाल सुधार गृहमा रहेका दुई समूहले भने तोडफोडमा उत्रिएका छन्।

आइतबार दिउँसो एक समूहसँग झडप नगर्ने सहमति भए पनि अर्को समूहले उक्त सहमति कार्यान्वयन नगरी तनावको स्थिति सिर्जना भएको बताइएको छ । 

महिला, बालबालिका तथा ज्येष्ठ नागरिकमन्त्री सुरेन्द्रराज आचार्यले सोमबार उक्त बाल सुधार गृहको विधिवतरुपमा उद्घाटन गर्ने कार्यक्रमसमेत थियो। अब उक्त कार्यक्रम प्रभावित हुने देखिएको छ।
 
दुई समूहले एकले अर्कोलाई कुटपिट गर्न खोजेपछि प्रहरीले रोक्ने प्रयास गरिरहेको बताएको छ । अहिले दुवै समूहलाई भित्रै राखेर प्रहरीले स्थिति सामान्य बनाउन खोजेको छ ।  एउटा ब्लकमा २३ जना र अर्को ब्लकमा ९३ जना राखिएका छन्। उनीहरूबीच ढुङ्गा हानाहान भएको थियो।

आइतबार अपरान्ह ४ बजेतिर हानाहान हुँदा एक जना बालबन्दी घाइते भएका छन्। घाइतेलाई नेपालगन्ज मेडिकल कलेज शिक्षण अस्पताल कोहलपुरमा भर्ना गरिएको छ। अहिले स्थिति नियन्त्रण लिन नेपाल प्रहरी र सशस्त्र प्रहरीको थप सुरक्षा बल खटिएको छ।

यस बाल सुधार गृहमा १८ वर्षभन्दा माथिका मात्र बन्दी छन्। केही समय अघि मात्र सञ्चालनमा आएको उक्त बाल सुधार गृहमा एक सय १६ जना बन्दीहरू छन्।