राष्ट्रिय सभाका रिक्त १९ वटै सीटमा उम्मेदवारी दिने एमालेको निर्णय, ६ जना केन्द्रीय सदस्यमा मनोनीत

२० पुस, काठमाडौं । नेकपा एमालेले राष्ट्रिय  सभामा रिक्त रहेको १९ वटै सीटका लागि उम्मेदवारी दिने भएको छ । शुक्रबार बसेको पार्टीको सचिवालय बैठकले रिक्त सबै सीटमा उम्मेदवारी दिने निर्णय गरेको बैठकपछि पार्टीका महासचिव शंकर पोखरेलले जानकारी दिए ।
 
हामीले क्लष्टरवाइज रूपमा नामबारे छलफल गरेका छौँ । कतिपय क्लस्टरको विषयमा स्पष्ट हुनुपर्ने भएकाले ती विषयमा आजको बैठकमा प्रारम्भिक छलफल भयो,पत्रकार सम्मेलनमा पोखरेलले भने । बैठकले प्रदेश अधिवेशनपछि जिम्मेवारीबाट बाहिरिएका पाँच प्रदेशका अध्यक्षसहित ६ जनालाई केन्द्रीय सदस्यमा मनोनीत गरेको छ । 

एमालेले ६ जनालाई पार्टी केन्द्रीय सदस्यमा मनोनीत गरेको हो । सचिवालय बैठकले कोशीका तुलसीप्रसाद न्यौपाने, बागमतीका केशवराज पाण्डे, कर्णालीका विनोद शाह, सुदूर पश्चिमका दामोदर भण्डारी, मधेसका रामअवतार यादव र झापाका दीपक कार्कीलाई केन्द्रीय सदस्यमा मनोनीत गरेको महासचिव पोखरेलले जानकारी दिए ।