प्रधानमन्त्री सहायता कोषमा हालसम्म २८ करोड जम्मा, घोषणा अनुसार आएन राहत

२२ पुस, काठमाडौं । हालसम्म प्रधानमन्त्री दैवी प्रकोप सहायता कोषमा २७ करोड ९९ लाख ८१ हजार ३६८ रुपैयाँ जम्मा भएको छ । दैवी प्रकोप सहायत कोषको कार्लालयका अनुसार जाजरकोट भूकम्पपछि हालसम्म १२० भन्दा बढी व्यक्ति तथा संस्थाले भूकम्पपीडितलाई सहयोग उपलब्ध गराउन कोषमा उक्त रकम जम्मा गरेका छन् । 

कार्यालयका अनुसार कात्तिक १८ गतेदेखि पुस २० गतेसम्मको अवधिमा उक्त रकम जम्मा भएको हो । गत कात्तिक १७ गते जाजरकोट जिल्लामा केन्द्रविन्दु भएर ६.४ म्याग्निच्युडको भूकम्प गएको थियो । भूकम्पका कारण संरचना भत्किदा १५४ जनाको मृत्यु भएको थियो भने ३०० भन्दा बढी घाइते भएका थिए । 

भूकम्पले ठूलो जनधनको क्षति गरेपछि सरकारले भूकम्पपीडितको सहयोगका लागि कोषमा रकम जम्मा गर्न अनुरोध गरेको थियो । त्यसपछि प्रधानमन्त्री दैवी प्रकोप सहायता कोषमा विभिन्न व्यक्ति तथा संस्थाले रकम जम्मा गरेका हुन् । भूकम्प गएको समयमा राहत घोषण धेरै भएपनि वास्तविक रुपमा राहत कोषमा जम्मा रकम गर्नेको संख्या कम भएको कार्यालयले जनाएको छ ।