प्रधानमन्त्री प्रचण्डले घटाए सचिवालय, एकै पठक १८ जनाको गयो जागिर

२६ पुस, काठमाडौं । आफ्नो दोस्रो कार्यकालमा व्यापक परिवर्तन गर्ने अठोट लिएका प्रधानमन्त्री पुष्पकमल दाहाल 'प्रचण्ड'ले सरकारी र निजी सचिवालयको कर्मचारी संख्यामा कटौती गरेका छन् । उनले दुवै सचिवालयमा रहेका कर्मचारीको संख्या घटाएका छन् । प्रधानमन्त्रीको सचिवालयबाट सरकारी र निजी समेत गरी १८ जनालाई जिम्मेवारी हटाइएको बताइएको छ । 

प्रधानमन्त्रीको सल्लाहकार सचिवालयमा ५, स्वकीय सचिवालयमा ३१ र निजी सचिवालयमा ४ जना थिए । जसमध्ये सरकारी तर्फका १० र निजी तर्फका ८ जनालाई हटाइएको बताइएको छ । हटाइएकामा जनसम्पर्क सल्लाहका/ देवेन्द्र पराजुली, प्रशासन सल्लाहकार रामदीप आचार्यदेखि प्रेस संयोजक नारायणप्रसाद ढुंगानासम्म रहेका छन् । 

प्रधानमन्त्रीको सचिवालयमा रहेका स्वकीय उपसचिव रमेशप्रसाद गुरागाईं, ओमकुमारी पौडेल र सावित्रीकुमारी अधिकारी पनि हटाइएका छन् । उनीहरू लगायत ८ जनालाई सचिवालयबाट हटाइएको बताइएको छ ।  कलबहादुर नाथ पनि प्रचण्डको सचिवालयबाट हटाइएका छन्। उनी पनि उपस्वकीय सचिवका रुपमा कार्यरत थिए ।

सरकारीतर्फ स्वकीय शाखा अधिकृत पुनम खड्का, दीपेन्द्र खड्का र लाल कुमाल तथा प्रशासन सहायक रामलाल पराजुली र युवराज शाह, कम्प्युटर सहायक वासुदेव शर्मा र खड्ग ओलीलगायत १० जनालाई हटाइएको बताइएको छ । 

प्रधानमन्त्री प्रचण्डका प्रेस सल्लाहकार गोविन्द आचार्य, परराष्ट्र सल्लाहकार रूपक सापकोटा, प्रमुख स्वकीय सचिव सन्तकुमार दरै, स्वकीय सचिव रमेश मल्ल र गंगा दाहाल भने यथावत् छन् । यसै गरी स्वकीय सहसचिव रहेका प्रेस विज्ञ मनहरि तिमिल्सिना, गोर्कण भट्ट र शिव खकुरेल पनि जिम्मेवारीमै रहेको बताइएको छ ।