जलहरी प्रकरणमा प्रतिवादी बनाइएका कोषका पूर्वसदस्य-सचिव थापा तीन लाख धरौटीमा रिहा

२७ पुस, काठमाडौं । पशुपतिनाथको मन्दिरमा सुनको जलहरी चढाउँदा भ्रष्टाचार भएको मुद्दामा अख्तियार दुरुपयोग अनुसन्धान आयोगले प्रतिवादी बनाइएका पशुपति विकास कोषका पुर्वसदस्यसचिव डा. मिलनकुमार थापा धरौटीमा रिहा भएका छन् । विशेषका न्यायाधीशद्वय खुसीप्रसाद थारू र रामबहादुर थापाको इजलासले यस्तो आदेश दिएको हो । 

दुवै पक्षको बहसपछि विशेषले उनलाई तीन लाख धरौटीमा रिहा गर्ने आदेश दिएको विशेषका प्रवक्ता धनबहादुर कार्कीले जानकारी दिए । पशुपति क्षेत्र विकास कोषका पूर्वकोषाध्यक्ष तथा सदस्यसचिव थापासमेतले जलहरी निर्माण गर्ने क्रममा सुनको परिमाण तथा गुणस्तरमा अनियमितता गरेको भन्दै मुद्दा  दायर भएको थियो । 

थापासहित तत्कालीन सदस्यसचिव डा. प्रदीप ढकाल र स्टोरकिपर अरुणकुमार श्रेष्ठसमेत यस मुद्दामा प्रतिवादी छन् । अख्तियार दुरुपयोग अनुसन्धान आयोगले यसै वर्ष १४ असोजमा पशुपतिको जलहरीमा भ्रष्टाचार भएको भन्दै मुद्दा दायर गरेको थियो । एक हजार चार सय ९१ ग्राम सात सय १८ मिलिग्राम सुन भ्रष्टाचार भएको दाबी अख्तियारले गरेको छ ।