राष्ट्रपतिले शीर्ष नेतालाई किन बोलाए शीतलनिवास ?

२७ पुस, काठमाडौं । राष्ट्रपति रामचन्द्र पौडेलले प्रमुख दलका शीर्ष नेताहरुलाई शीतलनिवास बोलाएर देशको समसामयिक विषयमा छलफल गराएका छन् । संसदको हिउँदे अधिवेशन बोलाउनु अघि द्वन्द्वकालीन घटनासम्बन्धी विबेयक, संवैधानिक परिषदसम्बन्धी विधेयक सहमतिमा टुंग्याउनुपर्ने भएकाले यनै विषयमा छलफलका लागि पौडेलले नेताहरुलाई शीतलनिवास बोलाएका थिए ।   

शीतलनिवासमा सत्ता साझेदार गठबन्धन र प्रमुख प्रतिपक्षी दलका शीर्ष नेताहरू अहिले जम्मा भएर छलफल गरिहेको बतायएको छ । राष्ट्रपति निवास शीतल निवासमा अहिले प्रधानमन्त्री पुष्पकमल दाहाल प्रचण्ड, नेपाली कांग्रेसका सभापति शेरबहादुर देउवा र प्रमुख प्रतिपक्षी दल नेकपा एमालेका अध्यक्ष केपी शर्मा ओलीबीच छलफल भइरहेको छ ।

शुक्रबार शीतलनिवासमा बोलाएर मुलुकमा देखिएका महत्वपूर्ण विषयहरू संघीयता कार्यान्वयन, सुशासन र विश्वविद्यालयमा सुधार गर्न ध्यानाकर्षण गराउनुभएको राष्ट्रपतिका प्रेस सल्लाहकार किरण पोखरेलले जानकारी दिए ।

उनका अनुसार राष्ट्रपति पौडेलले दलहरूले आफूहरुले मिलेर ल्याएको संघीयता कार्यान्वयन गर्न प्रदेशलाई अधिकारी दिने गरी तत्काल कानुनहरु पनि मिलेर बनाउन, निमुखाले न्याय पाउने गरी  सुशासन कायम गर्न नेताहरुको ध्यानाकर्षण गराएका थिए ।

त्यस्तै, पौडेलले त्रिभुवन विश्वविद्यालयमा उपकुलपति खाली रहेको बेला मेरो तेरो नभनी क्षमतावान प्राज्ञ ल्याएर यही मौकामा विश्वविद्यालय सुधारको अभियान शुरु गर्न पनि ध्यानाकर्षण गराएको सल्लाहकार पोखरेलले जानकारी दिए ।

पृथ्वीनारायण नारायण शाहको ३०२औँ जन्मजयन्ती तथा राष्ट्रिय एकता दिवसको अवसर पारेर राष्ट्रपतिले सत्तारुढ र विपक्षी नेताहरूलाई एकठाउँमा जुटाएका हुन् । शीर्ष नेताहरूको जमघट भएको शीतल निवासमा एक घण्टादेखि छलफल चलिरहेको छ । छलफलमा राष्ट्रियसभा निर्वाचन लगायतका विषय पनि उठेका छन् ।